చలువకు వేడికి సరికి సరి

 చలువకు వేడికి సరికి సరి

(అన్నమయ్య కీర్తనకు వివరణ)

డా.తాడేపల్లి పతంజలి 

రేకు: 0336-06  సం: 04-213

చలువకు వేడికి సరికి సరి

కలదిక హరి నీ కరుణే మాకు

చ.1: కాయము గలిగిన గలుగు దోడనే

పాయపుమదములు పైపైనే

రోయదు తనుగని రుచులే వెదకును

యేయెడ హరి నిను నెరుగుట యెపుడో

చ.2: కడుపు నిండితే ఘనమై నిండును

బడి బంచేంద్రియపదిలములు

విడువ వాసలును వెలయు బంధములు

కడగని మోక్షము గైకొనుటెపుడో

చ.3: పెక్కులు చదివిన పెనగుదోడనే

తెక్కుల పలు సందేహములు

యెక్కువ శ్రీవేంకటేశ నీవె మా-

నిక్కపు వేల్పవు నీచిత్త మికను

భావం

పల్లవి:

హరీ ! ఈలోకంలో ఒకదానికొకటి సరిపోతుంది.

కాని దేనికి సరిపోలని నీ కరుణే మాకు దొరికింది. మేము ఎంతోఅదృష్టవంతులం.

చ.1:

శరీరము కలిగిన వెంటనే క్రమంగా యౌవనము ప్రవేశిస్తుంది. 

ఇక ఆ యవ్వనపు మదాలు పైపైకి దూకి విజృంభిస్తాయి.

ఈ మలమూత్రాల దేహాన్ని చూసి ఆ యౌవనము రోయదు.

ఆ మురుగుగుంటల దేహంలో  రుచులే వెదకుతుంది.

హరీ ! ఈ కోర్కెలను దాటి   నిను ఎరుగుట ఎపుడో!?

చ.2:

కడుపు నిండితే చాలు.

అది గొప్పగా భావించి ఇంద్రియాలు (జ్ఞాన, కర్మేంద్రియాలు) నిర్భయంగా సిగ్గు లేకుండా వేరే తృప్తిని పొందటానికి ప్రయత్నిస్తాయి.

ఆశలు నన్ను విడువవు. అందువల్ల బంధములు పుడుతుంటాయి.

చివరకు మోక్షము గ్రహించుట ఎపుడో !

చ.3:

అనేకము చదివిన వెంటనే  ఒకదానికొకటి పెనగుతూ ఉబ్బుతూ చాలా సందేహాలు వస్తాయి.

శ్రీవేంకటేశ! నీవే మా నిజమైన దేవుడవు.

ఆసందేహాలు తీర్చే విషయంలో, మోక్షానుగ్రహంలో  నీ చిత్తం. ( నీ ఇష్టమని భావం)

విశేషాలు

పంచేంద్రియాలు

ఐదు కర్మేంద్రియాలు : వాక్కు, పాణి, పాదం, పాయువు, ఉపస్థలు.

ఐదు జ్ఞానేంద్రియాలు : చర్మము, కన్ను, చెవి, నాలుక, ముక్కు.

***