ఏదియుగాననందు నేది గాదందు

ఏదియుగాననందు నేది గాదందు

ఆచార్య  తాడేపల్లి పతంజలి

 

రేకు: 0356-03 సం: 04-329

ఈ కీర్తనలో  భగవంతుని యొక్క వివిధ రూపాలు, గుణాలతో కూడిన (సగుణ, సాకార) మరియు గుణాలు, రూపాలు లేని (నిర్గుణ, నిరాకార) తత్వాలను భక్తులు కొలవడం గురించి వర్ణించబడింది. భగవంతుని తత్వాన్ని పూర్తిగా తెలుసుకోవడం సాధ్యం కాదని, ఆ సర్వవ్యాపి అయిన శ్రీహరి యొక్క దాస్యం మాత్రమే తనకి శరణ్యమని అన్నమయ్య విన్నవించుకుంటున్నారు. చివరగా, భక్తుడికి కావలసింది వేంకటేశ్వరుని పాదసేవ మాత్రమే అని నిశ్చితాభిప్రాయాన్ని తెలియజేస్తున్నాడు.

పల్లవి:

ఏదియుగాననందు నేది గాదందు

ఆదిపురుష నీదాస్యమే చాలనాకు

తాత్పర్యము

ఏదియూ అని నిర్ణయించడానికి వీలులేని ఆ భగవంతుని తత్వాన్ని (ఏదియుగాననందు) ఏదీ కాదు అని కాదనడానికి వీలులేదు (నేది గాదందు). ఓ ఆదిపురుషా, నాకు అటువంటి తత్వాన్ని గురించి తెలుసుకోవాలనే ప్రయత్నం కన్నా, కేవలం నీ దాస్యమే (నీ సేవ) చాలు.

విశేషాలు

అన్నమయ్య ఇక్కడ వేదాంతపరమైన చిక్కుల నుండి వైదొలగి, భక్తిమార్గం యొక్క గొప్పతనాన్ని చాటుతున్నారు. బ్రహ్మము యొక్క సర్వవ్యాపకతను, అనంతత్వాన్ని అంగీకరిస్తూనే, భక్తునికి సులభమైన, నిశ్చితమైన మోక్షమార్గం కేవలం భగవత్సేవ (దాస్యం) మాత్రమే అని ప్రకటిస్తున్నారు.

---

చరణం 1:

గరిమ గొందరికి సాకారమై నిలిచితి

గురునిరాకారమై కొందరికి

సరుస గొందరికెల్లా సగుణుడవట నీవు

ధర నిర్గుణమవట తగిలి కొందరికి

తాత్పర్యము

గొప్పతనంతో కొంతమంది భక్తులకు మూర్తి రూపంలో (సాకారమై) నిలబడ్డావు. మరికొంతమందికి గొప్ప నిరాకార తత్త్వంగా (గురునిరాకారమై) ఉన్నావు. క్రమంగా కొందరికి నీవు గుణములతో కూడినవాడవుగా (సగుణుడవట) కనబడితే, ఈ లోకంలో (ధర) మరికొందరికి గుణములు లేనివాడవుగా (నిర్గుణమవట) కనబడుతున్నావు.

విశేషాలు

ఒకే పరమాత్మను వివిధ భక్తులు వారివారి మనోభావాలకు, జ్ఞానానికి అనుగుణంగా సాకారునిగా లేదా నిరాకారునిగా, సగుణునిగా లేదా నిర్గుణునిగా ఆరాధిస్తున్నారని, ఆ విభిన్న రూపాలన్నిటికీ భగవంతుడే మూలం అని అన్నమయ్య తెలుపుతున్నారు. ఇది భగవంతుని సర్వవ్యాపకత్వానికి, సర్వతోముఖత్వానికి నిదర్శనం.

---

చరణం 2:

వొకటగళాపూర్తి నొనరియుందువట

వొకట నిష్కళుడవై వుడివోవట

వొకచో జీవులకు నీకొరయ భేదమట

వొకచో నెన భేదమట వున్నారట నీకు

తాత్పర్యము

ఒకచోట అన్ని కళలతో కూడిన వాడివిగా (కళాపూర్తి) ఉందువట. మరొకచోట కళలు ఏమీ లేనివాడివై (నిష్కళుడవై) ఉంటావట. ఒకచోట జీవులకు నీకు మధ్య భేదం ఉన్నట్లుగా భావిస్తారు. ఇంకొకచోట అటువంటి భేదమే లేనివాడిగా (ఎన భేదమట) నీకు ఉన్నారని తెలుస్తుంది.

విశేషాలు

ఈ చరణంలో భగవంతుడు కళల (అంశలు, శక్తులు) తో కూడినవాడిగా (సకళ/కళాపూర్తి) మరియు కళలు లేనివాడిగా (నిష్కళ) కూడా ఉంటాడనే తాత్విక భావాన్ని తెలియజేస్తున్నారు. అట్లే, ద్వైత, అద్వైత సిద్ధాంతాల వంటి భేదం (జీవుడు - దేవుడు వేరు) మరియు అభేదం (జీవుడు - దేవుడు ఒకటే) భావనలు కూడా నీయందే ఉన్నాయని వివరిస్తున్నారు.

---

చరణం 3:

అదన నిందరిలోన నంతరాత్ముడవట

యెదుట శ్రీవేంకటేశుడవట

యిదియిది యననేల యింతయును నీ మహిమ

కదిసి నీ పాదాలే కనుగొంటగాక

తాత్పర్యము

సరిగ్గా (అదన) చూస్తే, ఈ అందరిలోనూ అంతరాత్మ రూపంలో ఉన్నావు. ఎదురుగా చూస్తే శ్రీ వేంకటేశ్వరుడి రూపంలో దర్శనమిస్తున్నావు. ఇక ఇది అని, అది అని అనడం దేనికి? ఈ కనిపించేదంతా నీ యొక్క మహిమే. అందువల్ల, నీ పాదాలను చేరుకొని, వాటిని దర్శించుకోవడమే (కనుగొంట) నాకు శ్రేయస్కరం.

విశేషాలు

అన్నమయ్య సర్వవ్యాపి అయిన పరమాత్మ అన్ని చోట్లా అంతరాత్మగా ఉంటాడనే సత్యాన్ని చెప్తూనే, సాక్షాత్తు కలియుగ దైవమైన శ్రీ వేంకటేశ్వరస్వామి రూపంలో కళ్ళెదుట నిలిచి ఉన్నాడని నిరూపిస్తున్నారు. తార్కికమైన వాదాలకు, వివరణలకు స్వస్తి చెప్పి, భక్తునికి అన్నీ నీ మహిమలే అని అంగీకరించి, సులభమైన, ప్రత్యక్షమైన భక్తి మార్గాన్ని (వేంకటేశుని పాదసేవ) శరణు కోరుకోవడం ఈ కీర్తన యొక్క సారాంశం.

సకలం- అకలం

 1. ప్రాణము, 2. శ్రద్ధ, 3. వ్యోమ, 4. వాయువు, 5. తేజస్సు, 6. జలము,7. పృథివి, 8. ఇంద్రియములు, 9. మనస్సు, 10. అన్నము, 11. వీర్యము, 12. తపస్సు, 13. మంత్రములు, 14. కర్మ, 15. లోకము, 16. నామము. (ప్రశ్నోపనిషత్తు 6-4) అని షోడశ కళలు.

షోడశ కళలతో కలిపి  ఆత్మ సకలం. వాటిని లయం చేసి పట్టుకుంటే నిష్కలం లేదా అకలం.    కళాప్రళయ మార్గమును  గురువు ద్వారా  గ్రహించాలని ప్రశ్నోపనిషత్తులో భాష్యకారులు చెప్పారు.

ధన్యవాదములు.

 

***