తల్లియుదండ్రియు మరి దైవము నాతడే కాక

తల్లియుదండ్రియు మరి దైవము నాతడే కాక

డా. తాడేపల్లి పతంజలి 

రేకు: 0335-04  సం: 04-205

పల్లవి: 

తల్లియుదండ్రియు మరి దైవము నాతడే కాక

యెల్ల జీవులకు మరి యెవ్వరింక దిక్కు

చ.1: యీ సంసారమునకు యితడె దిక్కు నే-

జేసేటిచేతలకెల్ల శ్రీపతే లోను

పాసిపోడెప్పుడు నన్ను బందువుడితడే నాకు

దాసుడైనవాడు హరిదగదు దూరగను

చ.2: చావుబుట్టుగులవేళ సతము నీతడే

సావి భోగములకు నిచ్చకుడీతడే

భావములోపల నుండుప్రాణ మీతడే నాకు

దైవము దూరగనేల తనకేమి వచ్చినా

చ.3: తలపులోపలికి యీదైవమే తోడు

యిలగలిమిలేములు కీతడే తోడు

పలుకులోపల నుండుభాగ్య మీతడె నాకు

కొలిచి శ్రీవేంకటేశుగొసరగనేటికి

భావం

పల్లవి:

తల్లియు తండ్రియు, దైవము ఆ విష్ణుమూర్తియే కదా !

ఎల్ల జీవులకు ఇక ఎవరు దిక్కుగా ఉన్నారు? (విష్ణువే దిక్కని భావం)

చ.1:

ఈ సంసారమునకు విష్ణువే దిక్కు.నేను చేసే అన్ని పనులకు  లక్ష్మీపతియే మొదలు.(అతనే మొదలుపెట్టిస్తాడని, అతని పనులే మొదట చేస్తానని భావం)

నన్ను ఎప్పుడు  విడిచిపెట్టడు.  నాకు ఇతడే బంధువు.

దాసుడైనవాడు ఎప్పుడూ హరిని నిందించకూడదు.అది తగని పని.

చ.2:

నా చావు పుట్టువుల సందర్భంలో నిత్యము ఉండేవాడు ఇతడే.

భ్రాంతి కొలిపే  నా భోగములకు ఇంపైన మాటలాడువాడు ఇతడే.( మాయ కప్పుతాడని భావం)

నా భావములోపలనుండుప్రాణము ఇతడే .

తనకేమి వచ్చినా దైవమును నిందించుట ఎందుకు? (నిందించకూడదని భావం)

చ.3:

తలపులోపల  ఈ వేంకటేశ దైవమే నాకు తోడు.

ఈ భూమిలో సంపదలకు, పేదరికానికి ఇతడే తోడు.

నా పలుకులోపల ఉండు భాగ్యము ఇతడే.

శ్రీవేంకటేశుని కొలిచి  మఱి కొంచెమిమ్మని యాచించుట ఎందుకు?

( ఆయనను కొలిస్తే చాలు. యాచించుట అనవసరమని , మనకు కావలసినది ఆయనే ఇస్తాడని భావం)

 ***