అవే చేతులు..

 అవే చేతులు..

      ప్రతాప వెంకట సుబ్బారాయుడు

ఒడిలోకి చేర్చుకుని ఓదార్చి..

ఆపన్నులకు అండగా నిలిచేవి- అవే చేతులు

విత్తనాన్ని మొక్కగా మొలిపించి..

కడుపులో ఆకలిని ఉపశమింపజేసేవి- అవే చేతులు.

సృజనాత్మకతకు జీవం పోసి..

ప్రపంచానికి పారిశ్రామిక వెలుగులిచ్చేవి- అవే చేతులు

ప్రతిభకు పట్టం కట్టి..

చప్పట్లతో నలుదిక్కులకు పరిచయం చేసేవి- అవే చేతులు.

 

ఉక్కు పిడికిళ్లుగా బిగిసి..

మానవహారంలో దారంలా నిలిచేవి- అవే చేతులు

ఉద్యమాలకు..సత్యాగ్రహాలకు ఊతమై..

విజయ మిఠాయిలు పంచేవి- అవే చేతులు.

స్వాతంత్ర్య పోరాటంలో సంకెళ్లకు వెరవక..

స్వేచ్ఛను సాధించి..జండా ఎత్తేవి- అవే చేతులు

కొవ్వొత్తుల మౌన ప్రదర్శన, 

గాలికి కొండెక్కకుండా అడ్డు నిలిచేవి..

హృదయ పుష్పగుచ్ఛాలను 

సమాధులపై పేర్చేవి- అవే చేతులు.

ప్రళయం ఆనవాళ్లను తుడిచిపెట్టి..

కొత్త జీవితానికి తోరణాలు కట్టేవి- అవే చేతులు

చేతుల చెమ్మలేని చరిత్ర లేదు

చేతుల కూర్పులేని విజయం లేదు.

***