బ్రహ్మోత్సవాలు- అన్నమయ్య కీర్తనలు-10 ( సర్వభూపాల వాహనము)

బ్రహ్మోత్సవాలు- అన్నమయ్య  కీర్తనలు-10 ( సర్వభూపాలవాహనము)

డా.తాడేపల్లి పతంజలి

2019 బ్రహ్మోత్సవాలలో భాగంగా నాలుగవరోజు 03-10-2019 గురువారం రాత్రి గం08.00ని. నుండి గం10.00నిలవరకు  అఖిలాండ బ్రహ్మాండ కోటి నాయకుడైన వేంకటేశునికి సర్వభూపాల వాహన సేవ జరుగుతుంది.

సేవాపరాః శివసురేశ కృశాను ధర్మ

రక్షోంబునాథ పవమాన ధనాధినాథాః

బద్ధాంజలిప్రవిలసన్నిజ శీర్షదేశాః

శ్రీ వేంకటాచలపతే తవ సుప్రభాతం||

ఈ శ్లోకం సర్వభూపాల వాహన సేవలో వినబడుతుంటుంది.

(ఎనిమిది దిక్కులను పాలించు  శివుడు,  ఇంద్రుడు,  అగ్ని,  యముడు,  నిరృతి, రావణుడు, వాయువు, కుబేరుడు నిన్ను సేవించుటకై  అత్మ శిరస్సులపై చేతులు జోడించినారు. ఓ వేంకటాచలపతీ! నీకు సుప్రభాతమగుగాక!)

సర్వభూపాలవాహనంలో స్వామి  సాధారణంగా కృష్ణుని రూపంలో దర్శనమిస్తాడు. (ఈ అలంకారం అప్పుడప్పుడు మారుతుంటుంది).

సర్వ భూపాలాధిపతి అయిన ఆ ప్రహ్లాద వరదుడైన   స్వామిని వినుతిస్తూ అన్నమయ్య  చేసిన ఒక కీర్తనను తాత్పర్యంతో తెలుసుకొని ఆ స్వామి పదాలకు నమస్కరిద్దాం. 

.

రేకు: 0328-04  సం: 04-163

పల్లవి:

కొలువైతా నల్లవాడె కూచున్నాడు గద్దెమీద

బలవంతు డితడు ప్రహ్లాదవరదుడు

చ.1:

 చిడుముడిగోళ్లతోడ సింహపుమోముతోడ

తొడమీదగూచున్న తొయ్యలితోడ

కడలేనినవ్వుతోడ కడురాజసముతోడ

అడరించీ బంతము ప్రహ్లాదవరదుడు

చ.2:

సంకుజక్రములతోడ చాయలమేనితోడ

సంకెదేర్చేయభయహస్తముతోడ

బింకపుమీసాలతోడ పెనువదనముతోడ

అంకె వరములిచ్చీ బ్రహ్లాదవరదుడు

చ.3:

 వనితకౌగిటతోడ వామకరముతోడ

ననుపైన తమలోనానందముతోడ

యెనయుచు శ్రీవేంకటేశుడై యీడా నాడా

అనిశము వెలసె బ్రహ్లాదవరదుడు

భావం

పల్లవి:

అదుగో..  గద్దెమీద ప్రహ్లాదునికి వరములిచ్చిన బలవంతుడైన  నరసింహస్వామి కొలువుచేస్తూ కూర్చున్నాడు.

చ.1:

కోపం కలిగిన గోళ్లతో, సింహపుమోముతో, తొడమీద కూచున్న అమ్మవారు లక్ష్మీదేవితో,అంతంలేని నవ్వుతో ,రజోగుణమువల్ల కలిగిన గర్వముతో ( విలాసముతో),పౌరుషాన్ని వ్యాపింపచేస్తూ ప్రహ్లాదునికి వరములిచ్చిన బలవంతుడైన  నరసింహస్వామి ఉన్నాడు.

చ.2:

శంఖచక్రములతో, ప్రకాశించే శరీరముతో,అభయహస్తముతో,బిగువైన మీసాలతో, పెద్ద మోముతో, మనస్సును తన

సమీపంలో ఉంచిన వారికి  వరములిచ్చిన బలవంతుడైన  ప్రహ్లాద నరసింహస్వామి కొలువుచేస్తూ ఉన్నాడు.

చ.3:

ఉత్తమమైన చేతులతో  చుట్టిన  లక్ష్మీదేవి కౌగిలిలో,అనురాగంతో, తమలోని ఆనందముతో ప్రకాశిస్తూ  శ్రీవేంకటేశుడై ఇక్కడక్కడ (ఇక్కడ అహోబలంలో, అక్కడ తిరుమలలో) ఎప్పుడు ప్రహ్లాదునికి వరములిచ్చిన బలవంతుడైన  ప్రహ్లాద నరసింహస్వామి  ప్రకాశిస్తున్నాడు.(ప్రసిద్ధికెక్కాడు)

  స్వస్తి

 

***