Wednesday, October 26, 2016

thumbnail

గోవింద దామోదర స్తోత్రం

 గోవింద దామోదర స్తోత్రం

రావి కిరణ్ కుమార్ 


కురు పాండవ సముహ మధ్యమున
దుశ్శాసన పరాభవితయగు ద్రౌపది
ఆక్రోసముతో పిలిచే క్రిష్ణా నీవే దిక్కని
ఓ గోవింద ఓ దామోదర ఓ మాధవా
శ్రీక్రిష్ణ విష్ణు మధు కైటభ సంహారి
భక్త వత్సలా భగవాన్ మురారి
కేశవా లొకనాధ నను బ్రోవుమా
ఓ గోవింద ఓ దామోదర ఓ మాధవా
వీధుల పాలు పెరుగులమ్మెడి వేళనూ
ప్రేమ పారవశ్యముతో నిండిన చిత్తము
కల గోపిక మనంబు మురారి పాదార్పితము చేసే  
ఓ గోవింద ఓ దామోదర ఓ మాధవా
గింజలతో నిండిన తిరుగలి పిడి మరల
మరల త్రిప్పు గోపికలు గానము చేసిరి
జనించిన అనురాగముతో
ఓ గోవింద ఓ దామోదర ఓ మాధవా
మణులు పొదిగిన మణికట్టుపై నిలిచిన
ఎర్రని కెంపు ను పోలిన వంపైన నాసికతో అలరారు
చిలుకతో కమల నయన పలికేనిలా
ఓ గోవింద ఓ దామోదర ఓ మాధవా
గృహ గృహమున ప్రతిక్షణము విడువక
పంజరముల నున్న చిలుకలతో ప్రేమగా
పునః పునః పలికించసాగిరి గోపాంగనలు
ఓ గోవింద ఓ దామోదర ఓ మాధవా
శిశువుల నిదురపుచ్చ  ఊయల లూపుతూ
జోల పాడసాగిరి గోపికలు విష్ణు  మహిమలు
రాగ తాళ మతిశయిల్లగా  
ఓ గోవింద ఓ దామోదర ఓ మాధవా
గుండ్రని నయనముల నటు నిటు సొంపుగా త్రిప్పుతూ
చూపులన్నీ బలరామానుజుని పై నిలపి  వెన్నముద్దను
ఆరగించ రా రమ్మని గోపికలు పిలువ సాగిరి
ఓ గోవింద ఓ దామోదరా ఓ మాధవా  
రాజహంస నడక వలె నర్తించు నాలుక
తలచినంతనే చవులూరించు తీయని
నామముల స్మరణలో నిలిచిపోయే
ఓ గోవింద ఓ దామోదరా ఓ మాధవా  
ఒడిలో కూర్చుండి పాలు త్రాగుతున్న
బాలుడైన కమల నాధుని కనులార కాంచి
పులకిత యగు యశోద నీ దయావర్షంలో తడిసే
ఓ గోవింద ఓ దామోదరా ఓ మాధవా  
వ్రజ భూమిలో తోటివారగు గోపబాలకులతో
ఆటపాటలయందు ఆనందించు ఆ నంద నందనుని
పిలిచే యశోద కడు  ప్రేమతో
ఓ గోవింద ఓ దామోదరా ఓ మాధవా  
పశువుల కట్టు పలుపు తాడుతో రోటి కి
కట్టబడి బిక్కమొగముతొ కోరే యశోదను
భంధనాలు వదులుచేయమని వెన్నతిన్న గోపాలుడు
ఓ గోవింద ఓ దామోదరా ఓ మాధవా  
కంకణములతొ క్రీడించు క్రిష్ణుని కనులను
అరచేత మూసి కడు  వయ్యారముల గోపిక
వెన్న ముద్దను చూపి ఆశ పెట్టసాగే
ఓ గోవింద ఓ దామోదరా ఓ మాధవా  
గృహముల యందు గోపకాంతలు ఒకచో
కూడినపుడెల్లను విడువక నీ పుణ్య నామములే
మరల మరల పలుకుచుండిరి అనురక్తితో
ఓ గోవింద ఓ దామోదరా ఓ మాధవా
గో గోప గోపికా జన సమూహము వివశులై వినుచుండ
మందార వృక్ష మూలమున ముద్దులొలుకు బాల కిశోరుడు
ఎర్రని పెదవులపై వేణువు నుంచి ఆలపించే కమనీయ గానం
ఓ గోవింద ఓ దామోదరా ఓ మాధవా
వెన్నచిలుకుతూ మురిపెమున యశోదా సుతుని
అల్లరి చేష్టలను పాడుచుండిరి కృతులుగా కవ్వపు
కంకణపు సవ్వడులకు జతగా ప్రాతః కాలమున గోపికలు
ఓ గోవింద ఓ దామోదరా ఓ మాధవా
మేలుకొన్న యశోద గృహమున వెన్నచేయ తలంచియు
తత్తరపడి సందేహ మనస్కురాలై నిజము పలుక మని
నిలదీసే మురారిని వెన్న దొంగయగు వెన్నుని
ఓ గోవిందా  ఓ దామోదరా  ఓ మాధవా
ప్రాతః ప్రార్ధనలు ముగించి పెరుగు చిలుకుతూ
ఉప్పొంగిన ప్రేమతో పాడ సాగిరి హరి గీతములు
గోపికలు చెలులతో కూడి సుస్వరముల
ఓ గోవిందా  ఓ దామోదరా  ఓ మాధవా
వేకువలో గోపికలచే దాచబడిన వెన్నతో
నిండిన కుండలను ముక్కలుగా పగులగొట్టి
కేరింతలాడుతూ చిందులేసే ముకుందుడు
ఓ గోవిందా  ఓ దామోదరా  ఓ మాధవా
ఆట పాటల లీనమై ఆకలి దప్పుల మరచి
పిలిచినా రా నిరాకరించు క్రిష్ణుని పదే పదే
పిలిచే యశోద పొంగు మాతృ వాత్సల్యమున
ఓ గోవిందా  ఓ దామోదరా  ఓ మాధవా
శేష శయ్య పై సుఖాసీనుడైన విష్ణుని
స్తుతించు దేవర్షి సంఘములు పొందే
నీ అంశారూప మచ్యుతా
ఓ గోవిందా  ఓ దామోదరా  ఓ మాధవా
అరుణోదయ వేళ నిదురను వీడి వేద విధులు
 కావించిన విప్ర వరేణ్యులు వేదాధ్యయనము
ముగిసిన పిమ్మట పలికెదరు నీ నామములు
ఓ గోవిందా  ఓ దామోదరా  ఓ మాధవా
బృందావనమున గోవిందుని వియోగముతో
పరితపించు రాధ హృదయవేదన చూసి
చెమరించు కనులతో గోప గోపికలు గానము చేసే  
ఓ గోవిందా  ఓ దామోదరా  ఓ మాధవా
ప్రభాతమున గ్రాసమునకై వెడలిన గోవుల చూసి
యశోద మృదు మదుర హస్త స్పర్సతో
గోపాలుని తట్టి నిదుర లేపసాగే
ఓ గోవిందా  ఓ దామోదరా  ఓ మాధవా
వృక్ష మూలములందు ముత్యపు జటల తో
శాఖముల భక్షణ తో  శోభిల్లు శరీరములు కల
మునులు జపించు చుండిరి నీ నామములు
ఓ గోవిందా  ఓ దామోదరా  ఓ మాధవా
 వ్రజ భూమిని వీడ నున్నాడన్న వార్త విన్న
గోప వనితలు గోవిందుని వియోగ వేదనతో
రోదించిరి వీధులబడి సిగ్గును విడచి
ఓ గోవిందా  ఓ దామోదరా  ఓ మాధవా
  
మణి  పంజరమునున్న చిలుకతో చెప్పించసాగె
నును సిగ్గులు నగుమోమున కదులాడ గోపిక
ఆనంద కందా  వ్రజ చంద్ర క్రిష్ణా
ఓ గోవిందా  ఓ దామోదరా  ఓ మాధవా
నిదురోవు గోపబాలకుల జుట్టుకు గోవత్సముల
తోకలకు జతకట్టు పద్మ నయనంబులవాడి
చుబుకము పట్టి తల్లి ప్రశ్నించ సాగే
ఓ గోవిందా  ఓ దామోదరా  ఓ మాధవా
గోవత్సముల కాయు కార్యమున కర్రలు చేబూని
వేకువనే విచ్చేసిన ఇష్ట సఖులగు గోప బాలురు
పిలవసాగిరి అవ్యయుని అనంతుని ఆత్మీయ భావమున
ఓ గోవిందా  ఓ దామోదరా  ఓ మాధవా
కాళీయుడిని మర్దించ కదంబ వృక్షాగ్రమునుండి
కాళింది మడుగు లోకి దూకిన క్రిష్ణుని   గని
గోప గొపాంగనలు ఘోల్లుమనిరి భయముతో
ఓ గోవిందా  ఓ దామోదరా  ఓ మాధవా
అక్రూరుని తోడుగా మధుర వీధుల యందు
విల్లోత్సవాలలో కంసుని  చాపమణచ నడుచు
ముకుందుని చూచి పురజనులు జయద్వానములు పలికే
ఓ గోవిందా  ఓ దామోదరా  ఓ మాధవా
కంసుని దూత రాకతో బృందావని వీడిపోవు
వసుదేవ సుతులని గని యశోద తల్లడిల్లి
సొమ్మసిల్లె గృహ మధ్యమున
ఓ గోవిందా  ఓ దామోదరా  ఓ మాధవా
సరోవరమున కాళీయ సర్పముచే చుట్టబడిన
బాల కృష్ణుని చూసి అసహాయులైన గోపా బాలురు
నేలను పడి పొర్లిరి పట్టరాని దు:ఖమున
ఓ గోవిందా  ఓ దామోదరా  ఓ మాధవా
అక్రూరుని రధముపై మధురా నగరి వైపు
సాగిపోవు యదువంశ నాధుని చూసి వగచి
మరల మరలి రావా యని అడగసాగిరి గోపబాలకులు
ఓ గోవిందా  ఓ దామోదరా  ఓ మాధవా
పూల పానుపు పై పరుండియు చెంత క్రిష్ణుడు లేని
చింతతో కలువ కనుల నిండా కన్నీటితో నుండె
గోపిక వనాంతమున వంటరిగా
ఓ గోవిందా  ఓ దామోదరా  ఓ మాధవా
స్వగృహమునకు చేరువైన గోపిక కట్టుబాట్లతో
కట్టడి చేయు తల్లి తండ్రుల తలంపు రాగా
విశ్వనాదా ! రక్షించమనె బరువైన హృదయముతో
ఓ గోవిందా  ఓ దామోదరా  ఓ మాధవా
అడవి యందు క్రిష్ణుడున్నాడన్న అభయముతొ
అర్ధరాత్రి వేళ బృందావని చేరిన గోపిక కన్నయ్య
కానరాక విలపించే భయముతో వనమున  
ఓ గోవిందా  ఓ దామోదరా  ఓ మాధవా
సుఖాసనమున సేదతీరుతూ నీ నామమలు
విడువక మరల మరల పలికిన ప్రేమతో
పొందుదురు నీ సారూప్యము సామాన్యులైనను
ఓ గోవిందా  ఓ దామోదరా  ఓ మాధవా
గోవిందుని వియోగముతో దు:ఖితురాలగు
నీరజాక్షి రాధను చూసి చలించిన చెలి
కలువ కనులు కన్నీటి ధారలు స్రవించే
ఓ గోవిందా  ఓ దామోదరా  ఓ మాధవా
మధుర పదార్ధములయందు అమితాసక్తి కల
నాలుకా  హితము కలిగించు నిజమిదే వినుమా
 మధుర పదార్ధముల వీడి మధురాక్షరములను భజించు
ఓ గోవిందా  ఓ దామోదరా  ఓ మాధవా యని
వేద విదులచె కీర్తించబడే నీ నామములు
వ్యాధి  నిర్మూలకములనియు సంసార
తాపత్రయ నాశ బీజములనియు
ఓ గోవిందా  ఓ దామోదరా  ఓ మాధవా
తండ్రి మాటను ఔదాల్చ అడవుల కేగు
సీతా లక్ష్మణ సమేత రామచంద్రుని చూసి
తల్లి కౌసల్య శోకముతో తల్లడిల్లే  
ఓ గోవిందా  ఓ దామోదరా  ఓ మాధవా
దండకారణ్యమున ఒంటరిగానున్న వేళ
దశ కంటునిచే అపహరణ కు గురైన సీతా మాత
ఆర్తి తో నిను తప్ప అన్య దైవమును తలచలేదు
ఓ గోవిందా  ఓ దామోదరా  ఓ మాధవా
రాముని హృది ని నిలుపుకున్న జానకి
ఆ రాముని వియోగము తాళలేక రోదించే
రఘునాధా శరణు శరణు యని
ఓ గోవిందా  ఓ దామోదరా  ఓ మాధవా
దేవ దానవులకు నొక్క రీతిగా సుఖ దు:ఖముల
నొసగు ఓ విష్ణు  రఘువంశ నాధా  శరణు శరణు
అని పరితపించె సీత సముద్ర మధ్యమున
ఓ గోవిందా  ఓ దామోదరా  ఓ మాధవా  
 మకరి నోట చిక్కి జలముల లోనికి  లాగబడు వేళ
 బెదరి  కరి బంధు సమూహములెల్ల చేదిరిపోగా
 గజరాజు మరల మరల తలచే నీవే దిక్కని
 ఓ గోవిందా  ఓ దామోదరా  ఓ మాధవా
పుణ్యములొసగు హరి నామముల స్మరించుచూ
 తొట్టి యందు పడిన పుత్రుని  పురొహితుడగు
శంఖయుతుని తో కలసి  హంసధ్వజుడు చూచె
ఓ గోవిందా  ఓ దామోదరా  ఓ మాధవా
మనసు యందు నిన్నే నిండుగా నిలుపుకున్న
ద్రౌపది అరణ్య వాసి అయినను దుర్వాసుని
ఆహ్వానించే శిష్య సహితముగా భోజనము నకు
ఓ గోవిందా  ఓ దామోదరా  ఓ మాధవా
యోగుల ధ్యానమునకు సైతము చిక్కనివాడు
చింతలను తొలగించి చింతితముల నిచ్చు పారిజాతము
నుదుటిన కస్తూరి తో  నీల వర్ణము తో మెరయు వాడు  
 ఓ గోవిందా  ఓ దామోదరా  ఓ మాధవా
సంసార కూపమను అగాధమున పడి పతితుడనైతి
విషయ వాసనలకు చిక్కి మోహందుడ నైతి
ఓ విష్ణు నను రక్షించు నా చేయి పట్టి నడిపించు
 ఓ గోవిందా  ఓ దామోదరా  ఓ మాధవా
ధండ ధరుడైన యముని దండనకు
గురియగు సమయాన ఓ నాలుకా
మధురమైన హరినామములు భక్తితో స్మరించు
ఓ గోవింద  ఓ దామోదరా  ఓ మాధవ
రసమయము మనోజ్ఞమగు సౌలభ్య మంత్రం
వేద వ్యాసాదులచే కీర్తించబడిన మంత్రం
ఓ నాలుకా భజించు భవ భంధాలు తొలగించు మంత్రం
ఓ గోవింద  ఓ దామోదరా  ఓ మాధవ
గోపాలా  వంశీధర  రూప సింధో
లోకేశా  నారాయణా దీన భందో
ఎల్లవేళలా హెచ్చు స్వరంతో స్మరించు
ఓ గోవింద  ఓ దామోదరా  ఓ మాధవ
ఓ నాలుకా సదా స్మరించు సుందరమగు
మనోహరమగు క్రిష్ణ నామములు సమస్త
భక్తుల ఆర్తి నివారక నామములు
ఓ గోవింద  ఓ దామోదరా  ఓ మాధవ
గోవింద గోవింద హరి మురారి
గోవింద గోవింద ముకుంద క్రిష్ణ
గోవింద గోవింద  రధాంగ పాణి
ఓ గోవింద  ఓ దామోదరా  ఓ మాధవ
సుఖానుభూతికి సారము నీవు
దుఖం చివరి అంచున భజించబడునది నీవు
దేహం విడుచు వేళ జపించబడునది నీవు
ఓ గోవింద  ఓ దామోదరా  ఓ మాధవ
దుశ్శాసనుని పరుష వాక్కులకు
భీతినొంది ద్రౌపది ప్రవేశించే సభా
మధ్యమునకు మనసు నీపై నిలపి  
ఓ గోవింద  ఓ దామోదరా  ఓ మాధవ
శ్రీక్రిష్ణ రాధాప్రియ గోకులేశ  
గోపాల గోవర్ధననాధా విష్ణో
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ
శ్రీనాధ  విశ్వేశ్వర   విశ్వమూర్తే
శ్రీ దేవకీ నందనా , దైత్య శత్రో
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ          
గోపీపతి, కంసారి , ముకుందా
లక్ష్మీపతి, కేశవ, వాసుదేవా  
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ          
గోపీజనాహ్లాదకర, వ్రజేశా
ఆలమందలకు తోడుగా అరణ్యముల తిరుగువాడ
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ          
ప్రాణేశా  విశ్వంభర  కైటభారి
నారాయణ చక్రపాణి
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
హరి మురారి మదుసూదన
శ్రీరామా సీతాప్రియ రావణారి
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
శ్రీ యాదవేంద్ర గిరిధరా కమలనయన
గో గోప గోపీ సుఖ దాన దక్ష
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
గోపాలుడివై భూమి కాచినవాడా
శేషుని సోదరుడివై లీలల వినోదించినవాడ
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
బకి బకాసుర అఘాసుర ధేనుకారి
కేశి  తృణావర్తులను నిర్జించినవాడా
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
శ్రీ జానకీ జీవన రామచంద్ర
నిశాచరారి భరతాగ్రజ
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
నారాయణ  అనంత హరి నృసింహ
ప్రహ్లదభాధాహర కృపాళు
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
నరోత్తముడైన రామ రూపా
సార్వభౌమా ప్రతాపశాలి  
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
శ్రీక్రిష్ణ గోవింద హరి మురారి
ఓ నాధా నారాయణ వాసుదేవా
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ  
సర్వులు పలుక సమర్ధులైనను జనులెవ్వరు
పలుకకుంటిరి తీయని నీ నామములు
ఓ నాలుక హరి నామామృతమును గ్రోలు
ఓ గోవింద  ఓ దామోదరా  ఓ మాధవ   
(ఇది శ్రీ బిల్వ మంగళాచార్య విరచిత శ్రీ  గోవింద దామోదర స్తోత్రం)

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information