ప్రాబ్లమ్ .. సాల్వ్డ్

 ప్రాబ్లమ్ .. సాల్వ్డ్

– కర్లపాలెం హనుమంతరావు

 

విక్రమ్ ఆఫీస్ రూమ్‌లో ఏసీ 18 డిగ్రీల్లో ఉన్నా, అతనికి మాత్రం లోపల చెమటలు పడుతున్నాయి.

 

అంతకుముందు వరకు అతని డిజిటల్ మార్కెటింగ్ స్టార్టప్ కంపెనీ మూడు పువ్వులు ఆరు కాయలుగా సాగింది. కానీ, ఇటీవల వచ్చిన ఆర్టిఫిషియల్ ఇంటెలిజెన్స్ (AI) విప్లవం, మార్కెట్ మందగమనం వల్ల క్లయింట్లంతా చేజారిపోయారు. ఉన్న ప్రాజెక్టులు ఊడిపోయాయి.

 

ఒకప్పుడు చేతినిండా డబ్బుతో ఐటీ కారిడార్‌లో బిల్డింగ్ అద్దెకు తీసుకుని, బౌన్సర్లను పెట్టి హడావుడి చేసిన విక్రమ్ పరిస్థితి ఇప్పుడు దారుణంగా తయారైంది. ఆఫీస్ స్పేస్ లీజ్ బకాయిలు, వైఫై, క్లౌడ్ సర్వర్ల బిల్లులు, ఇన్ స్టాగ్రామ్, ఫేస్‌బుక్ యాడ్స్ పెండింగ్ బకాయిలు కొండలా పేరుకుపోయాయి. పైగా సమాజంలో ఉన్న బ్రాండ్ ఇమేజ్ వల్ల ఎవరినీ అప్పు అడగలేని పరిస్థితి.

 

"సార్... ఆల్రెడీ రెండు నెలల జీతాలు పెండింగ్. డెడ్‌లైన్ రేపటితో అయిపోతుంది. రేపు గనుక సాఫ్ట్‌వేర్ సబ్‌స్క్రిప్షన్ ఫీజు కట్టకపోతే మన అకౌంట్స్ అన్నీ బ్లాక్ అయిపోతాయి. మొత్తం యాభై వేల రూపాయలు అర్జంట్‌గా కావాలి సార్" అంది అతని సెక్రటరీ లహరి.

 

లహరి చాలా నమ్మకస్థురాలు, తెలివైంది. తన జీతం రాకపోయినా విక్రమ్ ఇబ్బందిని గమనించి ఆఫీస్ మేనేజ్ చేస్తోంది. విక్రమ్ చికాకుగా తల పట్టుకున్నాడు.

 

"నువ్వు వెళ్ళు లహరి, నేను చూస్తాను" అని తన పర్సనల్ క్యాబిన్ తలుపులు వేసుకున్నాడు.

 

విక్రమ్ తీవ్రమైన ఆందోళనతో తన స్నేహితులకు, పాత క్లయింట్లకు వరుసగా ఫోన్లు చేయడం ప్రారంభించాడు.

 

 మొదటగా తన క్లాస్‌మేట్, రియల్ ఎస్టేట్ బ్రోకర్ అయిన కిరణ్‌కు ఫోన్ చేశాడు.

 

"హలో కిరణ్! ఎలా ఉన్నావ్? అరేయ్, నీకో మంచి బిజినెస్ ఐడియా ఇద్దామని ఫోన్ చేశా. మన ముంబై క్లయింట్ ఒకడు భూములు కొనడానికి చూస్తున్నాడు. నీకు భారీగా కమిషన్ వస్తుంది. కానీ ప్రస్తుతం నాకు అర్జంట్‌గా ఒక యాభై వేలు కావాలి, రేపే రిటర్న్ చేస్తా... ఏంటి? నీ సైట్ ఈసీ గొడవల్లో కోర్టులో ఉందా? సరే సరే!" విసుగ్గా ఫోన్ పెట్టేశాడు.

 

అలాగే ఒక ఫైనాన్స్ కంపెనీ మేనేజర్ రాజశేఖర్‌కు ఫోన్ కొట్టాడు.

 "సార్, నమస్తే. విక్రమ్‌ని. మా కంపెనీ షేర్ల మీద ఒక యాభై వేలు లోన్ కావాలి... ఏంటి? మా కంపెనీ క్రెడిట్ స్కోర్ పడిపోయిందా? రూల్స్ ఒప్పుకోవట్లేదా? ఓకే సార్, థాంక్స్."

 

చివరి ప్రయత్నంగా తన వద్ద గతంలో యాడ్స్ చేయించుకుని కోట్లు సంపాదించిన లోకల్ బిజినెస్ మేన్ శ్రవణ్ గౌడ్‌కు ఫోన్ చేశాడు.

 

"అన్నగారు నమస్తే! మీ బిజినెస్ మన యాడ్స్ వల్ల బాగా క్లిక్ అయింది కదా. ఇప్పుడు గూగుల్ ట్రెండ్స్‌లో మీకోసం ఒక కొత్త స్ట్రాటజీ ప్లాన్ చేశాను. కాకపోతే చిన్న హెల్ప్... ఒక యాభై వేలు గూగుల్ పే చేయగలరా? రెండు రోజుల్లో ఇచ్చేస్తా... అవునా? నిన్ననే కొత్త కార్ బుక్ చేసి అమౌంట్ అంతా డౌన్ పేమెంట్ కట్టేసారా? పర్లేదు లెండి అన్నగారు."

 

విక్రమ్‌కు ఆశాభంగం అయింది. ఆ నిరాశ, కోపం, చికాకు అతని ముఖంలో స్పష్టంగా కనిపిస్తున్నాయి. తనని నమ్మి ఫోన్ చేయని ప్రతి ఒక్కడి మీదా కసి పెరిగిపోయింది.

 

అంతలో లహరి లోపలికి వచ్చి, "సార్, బయట ముగ్గురు కుర్రాళ్లు మీ కోసం వెయిట్ చేస్తున్నారు" అంది.

 

"ఒక ఐదు నిమిషాలు ఆగమనండి" అంటూ విక్రమ్ కోపంగా లహరిని పిలిచాడు. "లహరి, ఒక నోట్ బుక్ తీసుకో. వీళ్లందరి పని చెప్తాను, నోట్ చెయ్."

 

  "మొదటిది, ఆ రాజశేఖర్ గాడి ఫైనాన్స్ కంపెనీ లోపాయికారీ అక్రమాల మీద రిజర్వ్ బ్యాంక్‌కు ఒక అజ్ఞాత ఈమెయిల్ డ్రాఫ్ట్ చెయ్."

 

  "రెండవది, ఆ శ్రవణ్ గౌడ్ గాడి గోదాముల్లో కల్తీ జరుగుతోందని జీహెచ్‌ఎంసీ విజిలెన్స్‌కు ఆన్‌లైన్ కంప్లైంట్ రైజ్ చెయ్."

 

 "మూడవది, మన ఫ్రెండ్ కిరణ్ గాడికి వచ్చే వారం ఇస్తానన్న బర్త్‌డే పార్టీ క్యాన్సిల్ అని మెసేజ్ పెట్టు."

 

లహరి శ్రద్ధగా  వాటన్నింటినీ రాసుకుంది. "సార్, నిజంగా ఇవన్నీ చేయమంటారా?" అంది.

 

"ఆగు లహరి, ప్రస్తుతానికి ఇవి హోల్డ్‌లో పెట్టు. ముందు ఆ బయట ఉన్నవాళ్లని లోపలికి పంపించు. క్రెడిటర్స్ ఏమో, చూసుకుందాం" అన్నాడు విక్రమ్ తెగింపుగా.

 

బయట ఉన్న ముగ్గురు యువకులు లోపలికి వచ్చారు. వారిలో ఒకడి చేతిలో హై-ఎండ్ డిజిటల్ కెమెరా, గింబల్ ఉన్నాయి. విక్రమ్ సీరియస్‌గా చూస్తూ, "ఎవరు మీరు? ఏం కావాలి?" అన్నాడు.

 

వారిలో లీడర్ లాంటి ఒక కుర్రాడు నవ్వుతూ, "సార్! మమ్మల్ని క్షమించాలి. మేము మీ పర్మిషన్ లేకుండానే మా పని పూర్తి చేసుకున్నాం" అన్నాడు.

 

విక్రమ్ గందరగోళంగా చూశాడు.

 

 "సార్, మేము ఒక ప్రముఖ ఓటీటీ (OTT) ప్లాట్‌ఫామ్ కోసం 'ఆధునిక కాలంలో యువ పారిశ్రామికవేత్తల మానసిక ఒత్తిడి' అనే సబ్జెక్ట్‌తో ఒక రియలిస్టిక్ వెబ్ సిరీస్ తీస్తున్నాం. అందుకోసం ఒక నటుడి ముఖంలో నిజమైన వ్యాపార నష్టం, నిరాశ, ఫోన్లలో అడిగేటప్పుడు వచ్చే ఆవేదన... ఇవన్నీ సహజంగా క్యాప్చర్ చేయడానికి ప్రయత్నిస్తున్నాం. నటులు ఎంత చేసినా ఆ ఒరిజినాలిటీ రావడం లేదు. మీ పరిస్థితి గురించి మీ సెక్రటరీ లహరి ద్వారా మాకు తెలిసింది. మీ క్యాబిన్ గ్లాస్ డోర్ నుండి, మీరు ఫోన్లు మాట్లాడుతున్నప్పుడు మీ ముఖంలో కదిలిన హావభావాలను, ఆ ఫ్రస్ట్రేషన్‌ను మా హిడెన్ కెమెరాతో అద్భుతంగా, లైవ్‌గా షూట్ చేశాం. సినిమాటోగ్రఫీ పరంగా ఇదొక మాస్టర్ పీస్ సార్!"

 

విక్రమ్ నోరు వెళ్లబెట్టాడు.

 

ఆ కుర్రాడు కంటిన్యూ చేశాడు, "మాకు ఇంత గొప్ప సహజమైన ఫుటేజ్ ఇచ్చినందుకు, మా డైరెక్టర్ గారు పంపిన సైనింగ్ అమౌంట్ ఇదిగోండి" అంటూ టేబుల్ మీద ఐదు కొత్త యాభై వేల రూపాయల నోట్ల కట్టను (₹50,000) పెట్టాడు.

 

విక్రమ్ ఒక్క నిమిషం పాటు స్తంభించిపోయాడు. ఆ తర్వాత అతని ముఖంలో వెలుగు చూసి, వచ్చిన వాళ్లకు థాంక్స్ చెప్పి పంపించేశాడు.

 

వాళ్లు వెళ్లగానే, లహరి వైపు చూసి, "లహరి! ఎంత గడుసుదానివి ! ఇదంతా నీ ప్లానా? థాంక్యూ సో మచ్. మన ప్రాబ్లం సాల్వ్ అయిపోయింది!" అంటూ ఆ యాభై వేల కట్టను ఆమె చేతిలో పెట్టాడు.

 

 "ఇదిగో నీ శాలరీ బకాయిలు."

 

"సార్... మరి ఇందాక రాసుకున్న కంప్లైంట్ ఈమెయిళ్లు టైప్ చేయమంటారా?" అని లహరి నవ్వుతూ అడిగింది.

 

విక్రమ్ ఆ నోట్ బుక్ పేజీని చింపేసి డస్ట్‌బిన్‌లో వేస్తూ, "అవసరం లేదు లహరి! కాలం కలిసి రానప్పుడు అందరూ శత్రువుల్లానే కనిపిస్తారు. ఇప్పుడు మన టైం స్టార్ట్ అయింది... ఆ ఈమెయిళ్ళు డిలీట్ చేసి, రేపటి బిజినెస్ ప్లాన్ రెడీ చెయ్!" అన్నాడు గట్టిగా నవ్వుతూ.

 

లహరికి ముందే తెలుసు... తన బాస్ కోపం క్షణికమే అని!

***