మృగశిర కార్తెలో ముంగిళ్లు చల్లబడును

మృగశిర కార్తెలో ముంగిళ్లు చల్లబడును

కాశీవిశ్వనాథం పట్రాయుడు ( బాలమిత్ర)

9494524445

శృంగవరపుకోట.

వేసవి ఎండలు మండిపోతున్నాయి. మధ్యాహ్నం వేళ ఇంటి ముంగిట కాలు పెడితే పాదాలు కాలిపోయేంత వేడిగా ఉండేది. చెట్ల నీడలో కూడా వేడి ఏమాత్రం తగ్గేది కాదు.

ఒకరోజు సాయంత్రం జున్నుబాబు ఇంటి బయటికి పరుగెత్తి వెళ్లి, వెంటనే "అమ్మో!" అంటూ మళ్లీ లోపలికి వచ్చాడు.

"ఏమైంది జున్నూ?" అని మురళి అడిగాడు.

"తాతయ్యా! ఇంటి ముందు నేల చాలా వేడిగా ఉంది. కాలు పెట్టలేకపోయాను!" అన్నాడు జున్నుబాబు.

మురళి నవ్వుతూ, "ఇంకొన్ని రోజులు ఓపిక పట్టు. మృగశిర కార్తె రాగానే ఈ వేడి తగ్గుతుంది," అన్నాడు.

"మృగశిర కార్తె వస్తే ఏమవుతుంది తాతయ్యా?" అని జున్నుబాబు ఆసక్తిగా అడిగాడు.

"ప్రకృతి తన రూపాన్ని మార్చుకుంటుంది. వేడి తగ్గుతుంది. గాలి చల్లబడుతుంది. భూమి ఊపిరి పీల్చుకున్నట్లుంటుంది. నువ్వే చూస్తావు," అన్నాడు మురళి.

కొద్దిరోజుల తర్వాత ఒక మధ్యాహ్నం ఆకాశమంతా నల్లని మేఘాలు కమ్ముకున్నాయి. చల్లని గాలి వీచింది. కొద్దిసేపటికే జల్లుల వాన మొదలైంది. ఎండిపోయిన నేల చినుకులను తాగుతూ మట్టి పరిమళాన్ని వెదజల్లింది.

వర్షం తగ్గిన తరువాత జున్నుబాబు ఇంటి బయటికి వెళ్లాడు. ఆనందంగా అక్కడే అటూ ఇటూ పరుగులు తీశాడు.

"తాతయ్యా! నిన్న బయట అడుగు పెట్టలేనంత వేడిగా ఉంది. ఇప్పుడు నేల ఎంత చల్లగా ఉందో!" అంటూ ఆశ్చర్యంగా అరిచాడు.

మురళి చిరునవ్వుతో,

"అందుకే మన పెద్దలు 'మృగశిర కార్తెలో ముంగిళ్లు చల్లబడును' అన్నారు బాబూ!" అన్నాడు.

"అంటే ఈ సామెత అర్థం ఏమిటి తాతయ్యా?" అని జున్నుబాబు అడిగాడు.

"మృగశిర కార్తె రాగానే వర్షాలు మొదలై భూమి వేడి తగ్గుతుంది. ఇళ్ల ముంగిళ్లు కూడా చల్లబడతాయి. ఆ చల్లదనం కేవలం నేలకే కాదు, మనుషుల మనసులకూ హాయిని ఇస్తుంది. ప్రకృతిలో వచ్చే ఈ మార్పును గమనించిన మన పెద్దలు తమ అనుభవంతో ఈ సామెత చెప్పారు." అని వివరించాడు మురళి.

జున్నుబాబు ఇంటి ముంగిట చల్లని నేలపై కూర్చొని చిరునవ్వుతో,

"తాతయ్యా! ఇప్పుడు నాకు అర్థమైంది, మృగశిర కార్తె రాగానే వర్షాలు మొదలై, ముంగిళ్లు చల్లబడతాయని." అన్నాడు జున్నుబాబు.

మురళి ప్రేమగా మనవడి తల నిమిరి, "అవును జున్నూ! ప్రకృతిని గమనిస్తే ఎన్నో విషయాలు నేర్చుకోవచ్చు. మన పెద్దలు అలాంటి అనుభవాలనే సామెతల రూపంలో మనకు అందించారు," అన్నాడు.

(అచ్చంగా తెలుగు అంతర్జాల పత్రికకు 7-7-26 న పంపడమైంది)