Thursday, September 22, 2016

thumbnail

ఆ ఒక్క క్షణం

  ఆ ఒక్క క్షణం

అక్కిరాజు శ్రీహరి 


(మనమే  దేవుళ్ళం అంటుంది వేదాంతం . అయినా కష్టపడి కొండలెక్కి ఎక్కడో వున్న  దేవుని విగ్రహాన్ని చూడటానికి  వెళతాడు మనిషి. ఓ పదేళ్ళ క్రితం, తిరుమల వేంకటేశ్వరుని గుడి సన్నిధిలో ఉన్న అనుభూతి మీ కోసం...)
తిరుమల వేంకటేశ్వరుని దర్శించటానికి వీలుచిక్కగానే  బయలుదేరాం   నేను, మా ఆవిడ  పిల్లలతో  సహా . ఓ గంట ముందుగా గుడి బయట లైనులో నిలుచున్నాం . ఎండగా వున్నా పైన 'కప్పు' ఉండటంతో అంత ఇబ్బందిగా  లేదు . పక్కనున్న మనిషి మాట్లాడటం మొదలుపెట్టాడు . ఏ రోజు ప్రయాణం మొదలుపెట్టాడో , ఆ చరిత్రనంతా.
లైను మెల్లిగా కదలటం మొదలుపెట్టింది . బయట బ్యాంకు వద్ద ఇంకో లైను ! రైల్వే రిజర్వేషన్స్ గుర్తుకొచ్చాయి. ప్రతిసారి మనం ఉన్న లైను కాక పక్కనున్నది చాలా వేగంగా కదులుతున్నదనిపిస్తుంటుంది. వెనకనుంచి ఒక్కసారి తోపుడుకు ఈ లోకం లో కొచ్చాను . ' నాదేం లేదండి . ఆ వెనకాల మనిషి తోస్తున్నాడు ' అతని సంజాయిషి !
అంతలో మొదటి పరీక్షా వలయంలోకి ప్రవేశం . మీ బ్యాగులన్నీ చూపించండి - ఆడ సెక్యూరిటి అథారిటి ! మా ముందున్న ఆవిడ , మీనాక్షి , భర్త అలానే పిలుస్తున్నాడు , తన భారీ చేతి బ్యాగు తెరచి చూపిస్తోంది . ఈ చెప్పులేంటి ? ఏమ్మా గుళ్ళోకి చెప్పులు తీసుకొస్తారా ? ఎలాంటి వాళ్ళొస్తారో !- ఆడ సెక్యూరిటి చీత్కారమ్! మీనాక్షి మొగుడు పిల్లవాడిని ఎత్తుకొని ముందుకెళ్ళి పోయాడు . ఈవిడ మండిపడ్డది . ' అవి పిల్లాడి వమ్మా , అసలే ఎండాకాలం, పసివాడి కాళ్ళు కాలవా? అవి తీసి పారేయటానికి మీరెవ్వరు? - ఎగిరిపడ్డది . సెక్యూరిటి ససేమిరా అంది . ఈవిడకి కోపం వచ్చింది- సెక్యురిటి పై కాదు, తన భర్త మీద - వెనక్కు వచ్చి తనకు 'సప్పోర్ట్ ' ఇవ్వలేదని! చిరచిరలాడుతూ అందరిని తోసుకు వెళ్లి , పిల్లవాణ్ణి లాక్కుని- మొదలుపెట్టింది-- ఆగలేదు ఇంకా .... ఈ  లోపు  రెండో వలయంలోకి ప్రవేశం--   కంప్యూటర్లో ఫోటోలను సరి చూసుకొని పంపిస్తున్నారు .  పదండి పదండి అని తోస్తున్నారు ఇక్కడి మగ సెక్యురిటి .  భారీ శరీరం , మహాలక్ష్మి , పాపం వేగంగా పోలేకపోయింది . వాడి చెయ్యి పడగానే ఇంతెత్తున లేచింది . నా మీద చేయి వేస్తావురా అంటూ -- సర్దిచెప్పినా , గొణుక్కుంటూ తిట్టుకుంటూనే వుంది . పెద్ద హాలులో కొచ్చి కూర్చున్నాం . ఉదయం ఎప్పుడో తిన్న ఫలహారం - ఆకలేస్తుంది . ఇంతలో పక్కన కూర్చున్న పరంధామయ్య ఆ  రోజు పేపరు తీసి చదవటం మొదలుపెట్టాడు , కొంచెం గట్టిగానే - జరుగుతున్న విషయాలకు తెగ బాధ పడి పోతూ - పొలిటీషియన్సును తిట్టేస్తున్నాడు . నాలుగు రోజుల తర్వాత మా అబ్బాయి రిజల్ట్స్ వస్తాయి , ఏ కాలేజి లో సీటు వస్తుందో , ఎలా వుంటుందో ... మీరు వింటున్నట్లు లేదు. పక్క ఆసామి మాటలతో మళ్ళి ఈ  లోకం లోకి .. హాలు తలుపులు తెరిచారు . అందరు పరిగెత్తటం   మొదలుపెట్టారు .  మళ్లీ  ఇంకో 'క్యూ ' -- వెనకున్న 'వసంత' తెగ బాధ పడి పోయింది . మా వెనకాల వచ్చిన వాళ్ళు అంత ముందుకెలా వెళ్ళారు ? అలా ఎలా వెళ్ళనిచ్చారు? ఒక పద్ధతి లేదు -- తిట్టి పో స్తూంది . ఈ లోపల ఒక పిల్లవాడి ఏడుపు- ఆకలేసింది కామోసు!
ఒక్కసారి గుంపు లోంచి అరిచారు ఎవరో .. ' గోవిందా గోవిందా ' అని - అందరూ అందుకున్నారు రెండోసారి . ఇంతలో ఇంకో లైనులో వాళ్ళు కలిశారు. మీరు ఎన్నింటికి లైనులో నిలుచున్నారు? - పలకరింపులు !
ముఖ ద్వారం చేరాం - లోపలకు పంపించారు . దబదబా అందరు పరిగెత్తటం మొదలుపెట్టారు .shortcut లో కొందరిని వదిలేస్తున్నారు . తోసుకొని వెళ్ళడం -పిల్లలను చేయి ఆసరా యిచ్చి - అతి కష్టం మీద మహా ద్వారం దాటి లోపలకు వెళ్లాం . ఇక గర్భ గుడి లోకి వెళ్ళాలి .... మీనాక్షి ఇంకా భర్తను తన చూపుల తోను , మాటల తోనూ తిడుతూనే వుంది . మహాలక్ష్మి తన భుజాలనే కాదు శరీర మంతా కాపాడు కుంటూనే వుంది . ఆసామి ఆలయ అధికారులను గట్టిగా విమర్శిస్తూనే వున్నాడు పిల్లవాడు పాలకోసం ఏడుస్తూనే వున్నాడు . గర్భ గుడిలో గడప దాటి చూస్తున్నాను- తలయెత్తి చూస్తూ ముందుకు పోతున్నాం - సెక్యురిటి తోస్తూనే వున్నారు . అదిగో - ఎదురుగా సుందర మంగళ విగ్రహం ! ఆ క్షణం - ఈ  మనసులో ఏ ఆలోచనా లేదు - గతం పట్ల విచారం , భవితపై ఆరాటం! మినాక్షికి తన భర్త గుర్తుకు రాలేదు , ఆడ సెక్యురిటి ఆలోచనే లేదు . మహాలక్ష్మి తన శరీరం  చూడటం  లేదు ! పసివాడు ఏడుపు మానేశాడు ! ఆసామి ఆక్రోశం ఆపేశాడు ! గుడి నించి బయటకొచ్చాం . ఆలయ ప్రాగణంలో కూర్చుని గోపురం కేసి చూస్తున్నాను. మీనాక్షి మళ్లీ  భర్తతో తగవు. పసివాడికి ఆకలి- ఏడుపందుకొన్నాడు . ఆసామి మళ్లీ మొదలెట్టాడు - గుడిలో సెక్యురిటి మరీ ఎక్కువైందని . నేను 'ఆ' క్షణాన్ని గురించే ఆలోచిస్తున్నాను . ఇంత కష్టపడి , ఇన్ని శ్రమల కోర్చి ఇందరు వచ్చేది ఆ ఒక్క క్షణం కోసం ! ఆ క్షణం కోసం  ప్రతీక్ష , పరిశ్రమ , తపన - ఏముందా క్షణంలో ? ఏమీ లేదు - అవును. ఆ క్షణంలో ఈ దేహ స్పృహ లేదు. ఈ   బుద్ధి స్పురణ లేదు. ఈ  మనసు అసలు లేదు. ఏ  విధమైన ఆలోచనా లేదు . జీవాత్మతో పరమాత్మ భేటియా ? ప్రతిక్షణం ఆ క్షణం ఐతే ఎంత బావుంటుంది ? ' పదండి వెళ్దాం , ఈ  లోకంలోకి రండి ', మా ఆవిడ పిలుపుతో  మళ్లీ  ' ఈ క్షణం ' లోకి .
*********                                                                                        

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information