Tuesday, May 24, 2016

thumbnail

అన్నమయ్య పదం పరమార్థం - సటకాడు

 అన్నమయ్య పదం పరమార్థం - సటకాడు

డా.తాడేపల్లి పతంజలి 

                   
కొన్ని పదాలను పలికే విధానం అనుసరించి అర్థం మారుతుంటుంది.సటకాడు(మాయగాడు) అనే పదం కూడా అటువంటిదే.మధుర భక్తిలో వేంకటేశుడనే నాయకునితో , అన్నమయ్య ఒక నాయికగా మారి సరసాలడుతున్నాడు. “మాయగాడా”! అని స్వామిని పిలుస్తున్నాడు.మాయ కలవాడు మాయగాడు. మోసగాడా ! అని  సటగాడు పదానికి  పైకి వ్యావహారికంగా ఒక అర్థం కనిపిస్తుంది.మాయను కల్పించేవాడు దేవుడు.  ఆ ఆర్థంలో “దేవుడా ! అని అంతరార్థం.
          ఈ కీర్తనలొ ఒక పాదం పూవులా మెత్తగా గుచ్చుకొంటుంది. ఇంకొక పాదం మెచ్చుకొంటుంది. అన్నమయ్య మాయగాడు అనటానికి వాడిన సటగాడు పదాన్ని ఆయన కీర్తనలో దర్శించి పరవశిద్దాం.
పల్లవి:     ఏలోయి సటకాఁడ యెఱఁగనా నీసుద్దులు
                పోలించి యాపెవలపు పూసేవు నా మీఁదను
చ .1:       పువ్వుల చెండున వేసెఁ బొరుగున నుండి చెలి
                ఇవ్వల నాదిక్కు చూచే వేమీ నీవు
                నవ్వేవు నీకితవైతే నాచేతి కిటు చూపు
                నివ్వటిల్ల నిజాలకు నే వేసేఁగాని
చ .2:       కుంకుమ నీపైఁ జల్లె కొలుపుననున్నకాంత
                అంకెల నాచేయి దట్టే వప్పటి నీవు
                జంకించే వంతగలితే నింకా నదే నాకు నిమ్మా
                కొంకుగొసరెల్లాఁ దేర కోరి చల్లే నిపుడు
చ .3:       మెచ్చి నిమ్మపంటఁ జిమ్మె మేడమీఁదనున్నసతి
                కొచ్చి యడిగి కాఁగిటఁ గూడేవు నన్ను
                పచ్చిగా శ్రీవేంకటేశ బత్తి నాపైఁ గలిగితే
                మచ్చిక నదె ఇచ్చితే మరివేసే నిన్నును (రేకు: 0859-4 సం: 18-351)

అర్థ తాత్పర్యాలు

పల్లవి:  ఏమోయి మాయగాడా ! వేంకటేశ్వరా ! నీ మంచి మాటల సంగతి నాకు తెలియదా? !( నువ్వు మంచి మాటలు మాట్లాడవని భావం)నాతో ఆమెకు పోలికచెప్పి , ఆమె వలపు నామీద పూస్తున్నట్లు నన్ను భ్రమింపచేస్తావా?( నిజానికి నా మీద తమరికి ప్రేమలేదని వ్యంగ్యం)
చ .1:   ఏమిటయ్యా సోగ్గడా ! ఆవిడెవరో – నీ పక్కనే ఉండి నీపైన పువ్వుల చెండు వేసి, వేసింది తాను కాదన్నట్లుగా                            ముభావంగా ముఖం పెట్టుకు కూర్చుంది.
                   ఆ పూలబంతి  ఏదో  నేను వేసినట్లుగా నా వైపు చూస్తావేమిటి స్వామీ !
                   అదిగో నవ్వుతావేమిటి? నీకు అంత  ఆవిడగారు హితమయితే (ఇతవైతే) నా చేతికి  అందేటట్లుగా  ఆవిడని ఒక్కసారి                     చూపించు.
                 అసలు నిజాలేమిమిటో  బాగా ప్రకాశిస్తాయి. (నివ్వటిల్లు) నేను వేసానో, ఆవిడ వేసిందో- తెలుస్తుంది.
చ .2:                 నీ కొలువులో(సేవ) ఉన్న ఒక అమ్మడు నీమీద  కుంకుమ  చల్లింది .
                    ఆవిడ కుంకుమ చల్లితే సమీపంలో ఉన్న నా చేతిని – అప్పుడు నువ్వు ఉండలుచేసినట్లు మెలితిప్పావు.(దట్టేవు)
                    నన్ను బెదిరించావు కదా (జంకించేవు).  ఇంకా ఆవిడగారు  అంతగా నీ మనస్సులో కలిసుంటే- (కలితి) అదే- ఆ               కుంకుమనే నాకు కూడా   ఇయ్యవయ్యా!
                    సంకోచము( కొంకు కొసరు) మొత్తము తేటబడేటట్లుగా – నీమీద ఆ కుంకుమను ఆవిడగారు చల్లినట్లు నేను కూడా             ఇప్పుడే  చల్లుతానయ్యా!అప్పుడయినా నీ ప్రేమకు నేను దగ్గరవుతనేమో !
చ .3:              అదుగో ! ఆ మేడ మీద ఉన్న అమ్మడు నిన్ను మెచ్చుకొంటూ నిమ్మపండ్లను( నిమ్మపంట)  నీ మీద చల్లింది.
                    నన్ను తొలగమని అడుగుతావు(కొచ్చి) అంతలోనే నన్ను కౌగిటలో కలిసావు(కూడేవు)
                    శ్రీ వేంకటేశా ! అచ్చంగా  (పచ్చి) భక్తి  నా మీద కలిగితే
                    మోహముతో(మచ్చిక) అదిగో (అదె) ఇవ్వాలిసినది ఇచ్చావు.మరి – ఏంచెప్పమంటావ్ స్వామీ !నాతో పాటు నిన్ను           కూడా ఆ అమ్మడు చిన్నగా తగిలీతగనట్లుగా కొట్టింది( వేసె) .
                   నా కౌగిలిలో ఉన్నావ్ కదా తండ్రీ ! ఈ చిన్నపాటి దెబ్బలు తప్పవు.

ముగింపు

ఎందుకండీ ! ఈ నాయికా నాయకుల గొడవ.. హాయిగా “దేవా”! అని ఒక ఆధ్యాత్మిక కీర్తన  అన్నమయ్య వ్రాయవచ్చు !  అని మనకు ప్రశ్న రావచ్చు.చనువు  శృంగారంలో జాస్తి.  మీరు అన్నప్పుడు హృదయాల మధ్య ఎడం ఉంటుంది. శృంగారంలో నువ్వు  అని సంభాషణ మొదలుపెట్టినప్పుడు స్వామి –  బాగా దగ్గరగా వచ్చి అంతరంగంలో కొలువు  తీరతాడు.అందుకే- ఆ దగ్గరితనం మనకు కల్పించటం కోసమే –అన్నమయ్య శృంగార కీర్తనలు రచించాడు. దేవుడిని   “సటకాడా”! అన్నాడు.
స్వస్తి.

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information