Friday, May 22, 2015

thumbnail

'నాట్యవేదం' - చింతలూరు శ్రీలక్ష్మి

'నాట్యవేదం' - చింతలూరు శ్రీలక్ష్మి 

- బ్నిం


 ఒక నర్తకి ప్రఖ్యాతి పొందటానికి సాధన సరిపోతుంది. ఒక నర్తకి గురుస్థానం పొందటానికి ఖచ్చితంగా పాండిత్యం అవసరం – ఆ పాండిత్యానికి పరాకాష్ట శిష్యులు ప్రకాశించడం – దానికన్న పరమోత్క్రుష్టం శిష్యుల శిష్యులు ప్రఖ్యాతి చెందటం –
          ఇది మాత్రం ఆ నర్తకి గురువుగారికి ఇచ్చిన ఘనమైన గురుదక్షిణ –
శ్రీమతి శ్రీలక్ష్మీ చింతలూరు – ఆ స్థాయిలన్నీ దాటారు- ఇప్పుడామె గురించి చెప్పను మరో నెల చెప్తాను..కానీ.. ఆమె చేసిన ఒక అద్బుత చరిత్రని అక్షరీకరించాలని ప్రయత్నిస్తాను –
          ఆమె రాజమండ్రీ- దానవాయిపేటలో ఉంటున్నారు – హైదరాబాద్ లో అంతకుముందెప్పుడో 20 ఏళ్లక్రితం, నర్తకిగా ఆమె ప్రదర్శనకి నేను వహ్వా అనుకున్నాను-
          ఆతర్వాత ‘నాట్యవేదం’ కూచిపూడి డ్యాన్స్ అకాడమీ స్థాపకురాలుగా అధ్యక్షులుగా, నాట్యగురువుగా ఆమె సాధించిన విజయ రధగమనం చూసాను- ఈనెల ‘శింజారవం’ ఆ రథకేతనం గురించి రాద్దామని ఆమెని ఇంటర్వ్యూ చేయడం వాయిదా వేసుకున్నాను-   
మొన్న మే 3వ తారీఖున రాజమండ్రీలో అన్నమాచార్య జయంతి నృత్యోత్సవాలు పేరిట... జాతీయస్థాయి కూచిపూడి నాట్యపోటీలు నిర్వహించింది. నాట్యవేదం- 130మంది నాట్యగురువులు రాష్ట్రరాష్ట్రేతరప్రాంతాలనుంచి వచ్చి తమ శిష్యుల కళాప్రదర్శన చేయించారు-  ఆనాడు -  అవి పోటీలు అనిపించలేదు -  నిర్వాహకులు నిర్దేశించినట్లు అన్నమయ్య కీర్తనలనే కూచిపూడి నృత్యశైలిలో ఒక్కొక్కరూ 10నిముషాల వ్యవధిలో ప్రదర్శించారు-
ఇందులో 10సంవత్సరాలలోపు పిల్లలనుండి.... వీళ్లని సబ్ జూనియర్స్ అంటారుట – ఆపై 15సంవత్సరాల వరకు వారిని జూనియర్స్ అన్నారు – ఆ తర్వాత సీనియర్స్... ఇలా వీరితో అన్నమయ్య పదాలకి నృత్యాంజలి పట్టించారు. ఇవే కాక డ్యూయెట్స్- గ్రూప్స్ అనో రెండువిభాగాలు ఉన్నాయి – అన్నింటా అందరూ అన్నమయ్య వాచికానికి (సారీ...సాహిత్యానికి అనాలేమో) ఆంగికాహార్యసాత్విక లక్ష్యలక్షణాలు మాల కట్టి వేయించారు- ఆవెంటనే... అందరికీ పట్టంకట్టి...ప్రతిభకు పట్టాభిషేకం చేసారు-

పోటీలు పెడితే వార్తే- అయితే...అందుకు ప్రసిద్ధ నాట్యకారిణి సంగతులు రాయకుండా ఆమె నిర్వహించిన కార్యక్రమాన్ని గురించి రాయడానికి కారణం ఉంది. ఆనాడు రాజమండ్రీలో ఎన్నిమువ్వలు రవం చేసాయి – ఎన్ని గంటలు ఈ కార్యక్రమం నిరాఘాటంగా జరిగిందీ అనేది ఒక చరిత్ర...
అ రోజు ఉదయం 9గంటలనుండి రాత్రి 11గంటల వరకూ నిర్విరామంగా సాగిన ఈ సంగీత నృత్యోత్సవం అన్నమయ్య సంకీర్తనాఝురితో గోదావరి తీరాన్ని పులకరింపజేసింది. (ఉష్ష్...ఇది అన్ని గంటల వీడియోని
చూస్తూరాస్తున్నాను) అక్కడ ప్రతీకళాకారుడు చేసే నాట్యానికి వారివారి గురువుల హాహాభావాల్లో తృప్తినీ...(కొందరిలో అసంతృప్తినీ కూడా చూస్తూ) పుత్రోత్సాహాన్ని మించిన శిష్యోత్సాహానికి ముగ్ధునైపోయి రాస్తున్నాను –
          అందరూ వివిధ కీర్తనలని ఎంచుకున్నారు – ఓకే! అందులో కొత్తదనం ఏంటి?? కొందరు మాత్రం ఒకే కీర్తనని ప్రదర్శించినా వారి వారి మనోధర్మాల్తో కంపోజు చేసారు – అక్కడ... కనిపించింది...ఒక అద్బుతం! మనోధర్మం ... అంటే.. సృజనాత్మకత ఎంత విశిష్టమైనదో-  
          ‘ఆ కీర్తననే’ ఒకరు బృంద నృత్యంతో చేసారు- ఒకరు సోలో చేసారు- ఇంకొకరు డ్యూయెట్ లా కంపోజ్ చేసారు – ఇంకొకరు పిల్లల్తోనూ... మరొకరు పెద్దల్తోనూ.. ఒకరు అన్నమయ్య ‘పాయంటాఫ్ వ్యూ’ లో చేస్తే మరొకళ్లు దేవుడితోనే అభినయింపజేసారు. ఈ భావవైరుధ్యవైభవం కోసమే ఈనెల జోహార్ చెప్పాలనిపించింది-
 అందుకే....  ప్రఖ్యాత నర్తకీమణి శ్రీమతి శ్రీలక్ష్మి గురించి రాసేముందు ఈ గొప్పపనిని.... నాట్యగురువుల మెదడుకు పదును కల్పించిన గొప్పపనిని గురించి చెప్పాలనిపించింది- వచ్చే నేల ఏంరాస్తానో తెల్సిపోయింది కదా!

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information