Wednesday, April 22, 2015

thumbnail

చింతయా..నీకు...

 చింతయా..నీకు...

 - సుజాత తిమ్మన 
బంగారు తొడుగులైననేమి...
స్వామీ...!!
స్వేచ్ఛగా గాలి సోకుటకు
అడ్డంకులే కాదా...!!

ముత్యాలు..రతనాలు..
మణులు..మాణిక్యాల
 ఆభరణాలయితేనేమీ...
స్వామీ..!!
సుతిమెత్తని నీ మేను
 కందిపోవుటయే కాదా...!!

తిరునామమెపుడూ...
తీర్చిదిద్దుండునే...
ఏడుకొండల శేషాద్రి
 తల్పమై యున్ననూ...
స్వామీ..!!
విశ్రాంతి ఎరుగవు
 నీవెపుడూ...


ముగ్ధలగు ముద్దు గుమ్మల
 మురిపాల మగనివైనా...
 .స్వామీ..!!
మూలవిరాట్టువే కాదా...!!

శ్రీమంతుడవైనా...
నీకెపుడూ...
తీరని దాహమే...
స్వామీ...
వడ్డీలకు వడ్డీల
 ముడుపులన్నీ నీవే..
వడ్డీ కాసుల వాడివైనావే....

తల నీలాలర్పించి...
తల భారం దించు కొంటున్న
అభాగ్యులకు  అభయ హస్తమిచ్చి
ఆపదగాచే ఆది దైవమైనావే..
స్వామీ...


వేల వేల భక్తుల
 మెర ఆలకించుటేగానీ...
నీగోడును తెలుపవెపుడూ...
పెదవి విప్పి..
స్వామీ..!!
చిరునగవు చెదరుననీ..
చింతయా..నీకు...
వేగమే వచ్చి నా
మదిని నిదురించు..
హృదయమునే కంచుకోటగా మలిచెద
చిరుసవ్వడైనా కలగనీయక సేద తీర్చెద ..

శ్రీ వేంకటేశ్వరా...!!శ్రీ శ్రీనివాసా....!!
తిరుమల గిరి నిలయా...!!
గోవిందా..గోవిందా...హరి గోవిందా..!!
శిరసా నమామి... !!

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information