Thursday, September 22, 2016

thumbnail

నీకేం, నువ్వు అద్వైతానివి!

నీకేం, నువ్వు అద్వైతానివి!

భమిడిపాటి శాంత కుమారి



నీకేం,నువ్వు అద్వైతానివి!

దేనికీ అంటకుండా అన్నిటికీ అతీతంగా ఉంటావు,
కాలేకడుపు, కూలేబ్రతుకు,ఆలిజాలి ,
జననంమరణం అన్నీ మిధ్యే అంటావు,
కనబడేదంతా మిధ్య అంటావు,
కనబడనిది సత్యం అంటావు,
దానిని కనులు చూడలేవని ,
మనసు అనుభవించలేదని అంటావు,
బుద్ధి గ్రహించలేదంటావు,
ఆలోచన అందుకోలేదంటావు.
కానీ,నేను నీలా అనలేను,
ఎందుకంటే నేను ద్వైతాన్నికనుక!
అన్నం పరబ్రహ్మ స్వరూపమని
నమస్కరించమంటాను.
ఆలి,జాలి పరబ్రహ్మ స్వరూపమేనని
మనసును సంస్కరించమంటాను.
ఈ రాక పోకలు అతని లీలలని,
అసమాన హేలలని అంటాను,
ఆణువణువూ,ప్రతిక్షణమూ
అన్నీకూడా అతని స్వరూపమే అంటాను.
ఈ ప్రకృతి అతని పట్టమహిషని,
వారిద్దరూ ఈ సృష్టికి అమ్మనాన్నలని,
అలా తలచి వారిప్రేమ పొందమంటాను,
మంచిచెడులు,పగలురాత్రులు,జనన మరణాలు,
ఇవన్నీ అతని ఆటలంటాను.
నువ్వేమో ఏమీ లేదంటావు,
నేనేమో అంతా ఇదే అంటాను.
కానీ, నేనులేకుండా పోయే రోజోకటి వస్తుందని
నాకూ తెలుసు!
ఐతే,అంతవరకు ఈ అజ్ఞానులు
దారితప్పకుండా చూడటానికి, వారిని కాపాడటానికి,
నేనిలా నీతో వాదించాల్సిందే, నీతో భేదించాల్సిందే,
వీళ్ళని నెమ్మదిగా నీ వైపుకు నడిపించాల్సిందే,
అప్పటికీ కానీ నేను నీలో ఐక్యమవలేను.
***

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information