నారాయణుడు
పెయ్యేటి రంగారావు
ధన్యము ధన్యము - జన్మ ధన్యము
అష్టాక్షరితో - అన్నియు సాధ్యము ||
నారాయణుడే - నను గాచునయా
చింతలు వంతలు - నాకేలనయా?
ఒక పరి తలచిన - అదియే చాలును
అక్షుల ముందర - అగపడి తీరును ||
కమలనాభుడే - గతి యంటినయా
విమలముగా నిక - నను బ్రోచునయా
భవ బంధమ్ముల - తొలగించునయా
ఇహ పర సాధన - చేయించునయా||
శ్రీహరినే మది - శరణంటినయా
ముక్తి సిరిని ఇక - ఇడ బోవునయా
కోరిక లన్నవి - తొలగించెనయా
అహమే నాలో - తొలగించునయా||
నీలోత్పల శ్రీ - శ్యాముని కొలిచితి
శాంతాకారుని - వదలక దలచితి
భవబంధమ్ముల - తొలగించెనయా
విషయ వాంఛలను - పోద్రోలెనయా||
చక్రధారినే మది - ధ్యానింతునయా
సక్రమ మార్గము - తోపించెనయా
నారాయణ యని - జపియింతునయా
జన్మరహితమని - దీవించెనయా||
***
No comments:
Post a Comment