Saturday, December 23, 2017

thumbnail

తెలుపు గేయం

తెలుపు గేయం
టేకుమళ్ళ వెంకటప్పయ్య

రంగులు చూడగానే ఆకర్షణకు లోనవుతాం. రంగులకీ, మనసుకీ చాలా దగ్గర సంబంధం ఉంది. మనం ఇష్టపడే రంగు మన వ్యక్తిత్వాన్ని తెలియజేస్తుంది! ఫేవరెట్‌ కలర్‌ అంటే మన వ్యక్తిత్వమే! ఇష్టపడే రంగును బట్టి మనిషిని అంచనా వేయవచ్చు. ఆ రంగులకు సంబంధించిన లక్షణాలు మనిషిలో కనిపిస్తాయి. అంటే అభిప్రాయాలను నిర్ణయించడంలో రంగులు కీలక పాత్ర పోషిస్తాయి.  మనకిష్టమైన రంగును చూసినప్పుడు మనసుకు ప్రశాంతత, మానసిక ఆనందం కలిగేది అందుకే!! తెలుపు ఒక స్వచ్ఛమైన రంగు. ఇది అన్ని రంగుల సమ్మేళనం. స్వచ్ఛమైన తెల్లని పదార్ధాలు పంచదార, నురుగు, మంచు, ప్రత్తి, పాలు మొదలైనవి.భారతీయ సాంప్రదాయం ప్రకారం తెలుపు పవిత్రత, శాంతి, స్వచ్ఛతకు సంకేతం. తెలుపు రంగు శాంతికి, స్వచ్ఛతకి సంకేతం. ఈ రంగు ఇష్టపడే వ్యక్తులు శాంతి కాముకులు. ఎవరిమీదా ఆధారపడకుండా ఉండాలనుకుంటారు. ఎవ్వరినీ నొప్పించకుండా తమపని తాము చేసుకు పోయే లక్షణాన్ని కలిగి ఉంటారు. అలాంటి స్వచ్చమైన తెలుపు రంగు గురించి ఉన్న ఓ బాలగేయం చూద్దాం.

అమ్మమాట తెలుపు - ఆవుపాలు తెలుపు 
మల్లెపూలు తెలుపు - మంచిమాట తెలుపు
చందమామ తెలుపు - సన్నజాజి తెలుపు
మంచి మనసు తెలుపు - పావురాయి తెలుపు
పంచదార తెలుపు - పాలు పెరుగు తెలుపు
గురువుగారి చొక్కా తెలుపు - గోవింద నామము తెలుపు
జాజిపూలు తెలుపు - జాబిల్లి తెలుపు

బమ్మెర పోతనామాత్యుని సరస్వతీధ్యాన పద్యం:
శారద నీరదేందు ఘన సార పటీర మరాళ మల్లికా
హార తుషార ఫేన రజతాచల కాశ ఫణీశ కుంద మం
దార సుధా పయోధి సిత తామర సామర వాహినీ సుభా
కారత నొప్పు నిన్ను మది గానగ నెన్నడు గల్గు భారతీ


ఈ పద్యం పిల్లలందరికీ నోటికి రావాలి. ఈ పద్యంలో ఎన్ని తెల్లని వస్తువుల గురించి చెప్పారో తెలుసుకోనవలసి యున్నది.  తెల్లని మల్లెలు, చల్లని వెన్నెల, స్వచ్ఛమైన కాంతులు ఎన్ని విధాలుగా ప్రకాశించగలవో అన్ని తెలుపురంగు కాంతుల ఉపమానాలతో అమ్మవారిని పోల్చడం జరిగింది. స్వఛ్ఛమైన ధవళకాంతులలో ఆమె నిండి వుంటుంది. అందుకే స్వచ్ఛమైన మనస్సు కలవారికి సమస్త విద్యలూ సంప్రాప్తిస్తాయి. సంగీత సాహిత్యాలు సరస్వతికి ఆటపట్టులు.
***

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information