Wednesday, May 24, 2017

thumbnail

శ్రీరామకర్ణామృతం - 19

శ్రీరామకర్ణామృతం - 19
డా.బల్లూరి ఉమాదేవి 
కామవరం

81.శ్లో:వసాంతాక్షరాఖ్యే చతుఃపత్ర పద్మే
       త్రికోణాంతకంఠే ధరాతత్వ యుక్తే
      వరాభీతి పాశాంకుశం విద్రుమాభం
     గజాశ్వే నిషణ్ణం భజే రామచంద్రం

తెలుగు అనువాద పద్యము:
మ:అరయన్ భవ్యవసాంత వర్ణయుత పత్రాబ్జ త్రికోణోపరి
   స్థిర భూతత్త్వసమేతుడై రిపుభయోత్సేకప్రపాంశుంకుశ
స్ఫురితుండై వరవిద్రుమ ప్రతిభుడై భూతేశపుత్రాకృతిన్
పరగన్ జెన్నగు రామచంద్రవిభు సద్భక్తిన్ బ్రశంసించెదన్.

భావము:వకారముమొదలు సకారము వరకు నక్షరముల శోభ గల నాలుగు రేకులు గల కోణయంత్రము నందు భూత తత్త్వముతో కూడినట్టి పద్మ మందు గజాశ్వముల ఱందు కూర్చొన్నట్టి శ్రేష్టమైన యభయము,పాశము,. నంకుశము కలిగి పగడము యొక్క శోభను కలిగినట్టి లామచంద్రుని సేవించుచున్నాను.

82.శ్లో:బలాంతాక్షర ప్రాంతషట్పత్ర పద్మే
       లసత్తోయతత్త్వే వరాభీతిహస్తమ్
        మహాకుండికాంచాక్షమాలాం వహంతం
       చతుర్వక్త్రరూపం భజే రామచంద్రం

తెలుగు అనువాద పద్యము:
మ:పరగన్ భవ్య బలాంత వర్ణయుత షట్పత్రాంబుజంబున్ బలా
వరణంబై చెలువొందు నందు రిపు గర్వ  ధ్వంస హస్తోరు శ్రీ
కరసత్కుండిక యక్ష మాల ధరుడై కంజాసనాకారుడై
స్థిరతన్ నిల్చిన రామచంద్రు నతి భక్తి శ్రద్ధ కీర్తించెదన్

భావము:బకారము మొదలు లకారము వరకు గల యక్షరములు ప్రాంతమందుగల యుదక తత్త్వము గల యారు రేకుల పద్మమందుండి యభయ హస్తము కలిగినట్టి  కమండలువును జపమాలికను వహించుచున్న నాల్గు మోములు గల రాముని సేవించుచున్నాను.


83శ్లో:డపాంతరాఖ్యే మణివ్రాత పూరే
       రథాంగాబ్జ హస్తం మహేంద్రోపలాంగమ్
       లసద్వహ్నితత్త్వే నిషణ్ణం గదాంకం
      మహావిష్ణురూపం భజే రామచంద్రం.

తెలుగు అనువాద పద్యము:
మ:జ్వలనస్థానము నైడపాంత విలసద్వర్ణంబు నై యొప్పి యు
జ్జ్వలితంబౌ మణిపూరకంబున గదాచక్రాదిధారుండు నై
లలితేందీవర గాత్రుడై యనఘుడై  లక్ష్మీశు రూపంబునన్
జెలువైనట్టి రఘూద్వహున్  వరదునిన్ శ్రీరాము బ్రార్థించెదన్.

భావము:డకారాది పకారాంతములగు నక్షరములు కలిగి యగ్నితత్త్వము గల మణిపూరక చక్రమందు కూర్చున్నట్టి  శంఖచక్ర హస్తుడై  యింద్ర నీలములవంటి దేహము కలిగి గద చిహ్నముగా కలిగిన విష్ణురూపుడగు రామచంద్రుని సేవించుచున్నాను.

84శ్లో:కఠాంతాక్షరాఖ్యే జగత్ప్రాణతత్త్వే
        వరాభీతిహస్తం త్రిశూలం దధానం
         ఉమానాథమబ్జారిఖండోజ్జ్వలాంకం
      సదర్పాంగ రూపం భజే రామచంద్రం

తెలుగు అనువాద పద్యము:
మ:పవన స్థాన కఠాంత వర్ణ దళదీప్తంబై హరిద్రాభమై
ధ్రువమై యొప్పు ననాహతాంబుజము నందున్ శత్రుహృద్భీతి సం
భవ హస్తోజ్జ్వల శూలుడై గిరిసుతాభర్తై మృగాంకాకారుడై
శివరూపంబున దేజరిల్లు వరదున్ శ్రీరాము సేవించెదన్.

భావము:కకారాది ఠకారాంతాక్షర రూపమైన వాయుతత్త్వ రూపమగు ననాహత చక్రమందుండి యభయహస్తుడై త్రిశూలమును ధరించునట్టి చంద్రఖండము చిహ్నము గలిగి గర్విత రూపము గలిగి శివరూపుడైన రామచంద్రుని సేవించుచున్నాను.

85శ్లో:విశుద్ధాఖ్య పద్మే నభస్తత్ద్వ రమ్యే
      అరూపం సురూపం సమస్తస్వరూపం
    విశిష్టం మనోగమ్య మేకం త్వనాదిం
      భజే జీవ జీవాత్మ రామంచరామమ్.

తెలుగు అనువాద పద్యము:
మ:సకలాత్ముండయి రూపవర్జితుడునై సద్రూపియై జీవ రూ
పకవాచ్యుండు ననాదియై సుజన సంభావ్యుండునై పుష్కల
ప్రకట స్థాన విశుద్ధపంకజమునన్ భాసిల్లుచున్నట్టి న
య్యకలంకాత్మున కాజిపుత్రునకు నేనశ్రాంతమున్ మ్రొక్కెదన్.

భావము:ఆకాశతత్త్వరూపమైన విశుద్ధ చక్రమందున్నట్టి రూపశూన్యుడైనట్టి మంచి రూపము కలిగినట్టి సమస్త వస్తు రూపుడైనట్టి అధికుడైనట్టి మనస్సునకు మాత్రము గోచరించునట్టి అద్వితీయుడైనట్టు కారణము లేనట్టి జీవరూపుడును జీవులయందు రమించు వాడును నైన రాముని సేవించుచున్నాను .

86.శ్లో:ద్విపత్రాబ్జ మధ్యే మనస్తత్త్వ గమ్యే
          జగత్కారణం జ్యోతిరానందరూపం
          లసద్భావ విష్ణుం మనేభావదీపం                        పరాత్మ స్వరూపం   భజే రామచంద్రం.


తెలుగు అనువాద పద్యము:

మ:తత హృత్పద్మమునన్ ద్విపత్ర కమల స్థానంబునందున్ మనో
గత దీపంబు బరాత్మ రూపము జగత్కల్యాణబీజంబునై
యతుల జ్యోతియు నై పరాత్పరమునై సానందమై కేశవ ప్రతిభం జెందిన రామచంద్రవిభు సంభావించి సేవించెదన్.

భావము:మనస్సు యొక్క తత్త్వముచే బొందదగిన రెండు రేకులు గల పద్మము యొక్క మధ్యము నందున్నట్టి జగత్తులకు కారణమైనట్టి తేజోరూపము ఆనందరూపము నైనట్టి ప్రకాశించుచున్న భావములయందు వ్యాపించినట్టి మనస్సునందు దీపమువలె నున్నట్టి పరమాత్మ స్వరూపుడైన రాముని సేవించుచున్నాను.

87.శ్లో:సదానంద దేవే సహస్రార పద్మే
గలచ్చంద్ర పీయూష ధారా ప్లుతాంతే
     స్థితం రామమూర్తిం నిషేవే నిషేవే
      నసేవేన్యదైవం నసేవే నసేవే.

తెలుగు అనువాద పద్యము:
మ:తత సాహస్రదళాప్త  నిర్గళ సుధా ధారాభిషేకంబునన్
సతతానందమునన్  జెలంగిన రఘుస్వామిన్ బరంధాము నా
శ్రిత చింతామణి రామచంద్రు  మదినే సేవింతు నిష్టాప్తికై
నితరాదిత్యుల నెంతకాలమునకున్నేనెంచ జిత్తమ్మునన్.

భావము:నిత్యానందముచే ప్రకాశించుచున్నట్టి జారుచున్న చంద్రుని యమృత ధారచేత రమ్యమైన సహస్రార పద్మమందున్నట్టి శ్రీరామ మూర్తిని  సేవించుచున్నాను.సేవించుచున్నాను.ఇతర దైవమును నేను సేవించను. సేవించను.సేవించను.


88.శ్లో:సుధాభాసిత ద్వీప మధ్యే విమానే
         సుపర్వాళి వృక్షోజ్జ్వలే శేషతల్పే
        నిషణ్ణం రమాంక నషేవే నిషేవే
         నసేవేన్యదైవం నసేవే నసేవే.

తెలుగు అనువాద పద్యము:
మ:తతదుగ్ధాబ్ధి సితాంత రీపమున మందారోప కంఠోర్వి సం
స్థిత సత్పుష్పక మధ్య సోమ విలసచ్ఛేషాహి తల్పంబునన్
సతతంబున్ కమలాయుతుండగు రఘుస్వామిన్ బరంధాము నా
శ్రితమందారము రాము దప్పనొరులన్  జింతింప భావంబునన్.

భావము:అమృతముచే ప్రకాశించుచున్న ద్వీపము యొక్క  మధ్యమందుగల విమానమందు కల్పవృక్షములచే ప్రకాశించుచున్న శేషశయ్య యందు గూర్చున్నట్టి లక్ష్మి తొడయందుగల రాముని సేవించుచున్నాను.ఇతర దైవమును సేవించను.సేవించను.సేవించను.

89.శ్లో:చిదంశం సమానంద మానందకందం
         సుషుమ్నాఖ్యరంధ్రాంతరాళే చ హంసం
        సచక్రం సశంఖం సపీతాంబరాంకం
      పరంచాన్యదైవం నజానే నజానే.

తెలుగు అనువాద పద్యము:

మ:సరసానందు సుషుమ్న మధ్యగత హంసస్థున్ జిదంశున్ గర
స్ఫురదబ్జారి గదాది సాధను జగత్పూర్ణాత్ము బీతాంబురున్
వరయోగీశ్వర భావ భావితు జిదానందున్ ముకుందున్ బరా
త్పరున్ శ్రీ రాము భజింతు నన్యులను సంభావింప భావంబునన్.

భావము:జ్ఞానరూపుడైనట్టి హెచ్చు తగ్గు లేని యానందము కలిగినట్టి యానందమునకుకారణమైట్టి సుషుమ్నా నాడియొక్క మధ్యమందు హంసరూపుడైనట్టి  చక్రముతో గూడినట్టు పీతాంబరముతో  గూడినట్టి రాముని సేవించుచున్నాను. ఇతర దైవము నెరుగను;ఎరుగను.

90.శ్లో:సుపర్వాళి వృక్షోజ్జ్వల స్వర్ణపీఠే
         వనౌకోముఖై ర్మౌనిభి స్సేవ్యమానం
         స్థితం పుష్పవృష్ట్యావృతం రామమూర్తిం
          సదా భూమిజాయుక్త మీళే హృదంతే

.
తెలుగు అనువాద పద్యము:
చ:చందన వృక్షమూల విలసత్తపనీయ మృగేంద్ర పీఠి నా
     నందము మీర జెన్నలరి నవ్యసుమోత్కర వర్షితాంగుడై
సుందర వామభాగ పరిశోభిత జానకియై మునీంద్ర
సద్బృందము వానరుల్ గొలువ బెంపు వహించిన రాము గొల్చెదన్.

భావము:కల్ప వృక్షములచే ప్రకాశించుచున్న బంగారు పీఠ మందున్నట్టి౹ వానరులు మొదలగు వారి చేతను మునుల చేతను సేవింప  బడుచున్నట్టి పువ్వుల వానచేత నావరింప బడినట్టి  యెల్లప్పుడూ సీత తో కూడినట్టి శ్రీ రామమూర్తిని  హృదయమధ్యమందు స్తోత్రము చేయు చున్నాను.

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information