Tuesday, February 23, 2016

thumbnail

అమ్మ ఒడి

అమ్మ ఒడి

డా . నీరజ అమరవాది .


కమలాకర్ కి జీవితం ఈ మధ్య వెళ్లే ఆసుపత్రి వచ్చే ఆసుపత్రిగా గడిచిపోతోంది . రెండేళ్ల క్రితం కమలాకర్ తల్లి కాలం చేసింది . ఆ తరువాత పెద్దతనంలో తండ్రి శేషయ్య ఒక్కడే గ్రామంలో ఎందుకని , కొడుకుగా తండ్రిని చూసుకోవటం బాధ్యతగా భావించి తనతో పాటు హైదరాబాదు కు తెచ్చుకున్నాడు . అలా రావటం శేషయ్యకి ఏ మాత్రం ఇష్టం లేదు . ఉన్న మూడెకరాల పొలం అంటే శేషయ్యకు ప్రాణం . సొంత వ్యవసాయం తో ఆ పొలం పై వచ్చిన ఆదాయం తోనే , ఇల్లుగడిచింది . కమలాకర్ కి కావలసిన చదువు చెప్పించాడు . మంచి ఉద్యోగం వచ్చింది . కమలాకరానికి ఇప్పుడు పొలం పని అంటే చాకిరి ఎక్కువ , ఆదాయం తక్కువ అనిపించింది . తండ్రికి ఇష్టం లేకపోయినా పొలాన్ని ఎవరికో కౌలు కిచ్చి పట్నం తీసుకు వచ్చాడు .
శేషయ్యని కోడలు వనజ ఏ లోపం లేకుండా చూసుకుంటోంది . శేషయ్యకి ఏ రకమైన ఇబ్బంది లేదు . కాని ఒకరోజు ఉన్నటుండి కళ్లు తిరిగి పడిపోయాడు . డాక్టర్ కి చూపిస్తే హై బి.పి అని చెప్పారు . మరి కొన్ని రోజులకి షుగరు కూడా వచ్చింది . శేషయ్య ఆందోళన పడతాడని , కమలాకర్ వాళ్ల నాన్నతో “ డెభ్భై ఏళ్లు వస్తే ఈ రోజుల్లో బి.పి , షుగరు సర్వసామాన్యం “ అంటూ సర్ధి చెప్పాడు . ఆ తరువాత కొన్ని రోజులకి కడుపులో నొప్పి అంటే ఆసుపత్రికి తీసుకెళ్తే పొట్టలో గాస్ వల్ల నొప్పి వచ్చిందని మందులు రాసి ఇచ్చారు . అలా శేషయ్య గారికి నెలకో కొత్త రకం ఇబ్బంది రావటం , హడావిడిగా ఆసుపత్రుల చుట్టూ ప్రదక్షిణాలు , రకరకాల స్కానింగ్ లతో మంచి నీళ్ల ప్రాయంలా డబ్బు ఖర్చు అవుతున్నా, ఆరోగ్యం మాత్రం కుదుటపడలేదు . ఒకపక్క కమలాకర్ కి తండ్రిని గ్రామం నుండి తీసుకొచ్చి తప్పుచేశానా ! అని ఆలోచించాల్సి వస్తోంది . మరోపక్క బంధువులు , స్నేహితులు , చుట్టుపక్కల వాళ్లంతా , ఈ రోజుల్లో వృద్ధులైన తల్లిదండ్రులను పట్టించుకోని పిల్లలకు కమలాకర్ ‘ ఆదర్శనీయం ‘ అంటూ పొగుడుతుంటే అవుననాలో , కాదనాలో అర్థం కావడం లేదు . కొత్తగా ఈ మధ్య కమలాకర్ కి వాళ్ల నాన్నతో మాట్లాడుతుంటే ఎవరో అపరిచుతుడితో మాట్లాడుతున్న అనుభూతి కలుగుతోంది . భార్య వనజతో ఈ మాటే అంటే , అవును... అప్పుడప్పుడు, మామగారిలో కొద్దిగా మతిమరపు అదే ‘ అల్జీమర్స్ ‘ లక్షణాలు కనిపిస్తున్నాయండీ ! మీరు గమనించారో లేదో అంటూ మరో బాంబు పేల్చింది .
కమలాకర్ తనలో తానే తండ్రి ఆరోగ్యం గూర్చి మధనపడుతుంటే , అది గమనించిన దగ్గర స్నేహితుడు ఒకరు “నాకు తెలిసిన ప్రకృతివైద్యశాల ఉందని , అందులో ముఖ్యంగా పెద్దవారికి మంచి వైద్యం అందిస్తున్నారని , అక్కడి డాక్టర్లు దేశవిదేశాలలో కూడా గొప్ప పేరు గలవారని “ చెప్పాడు . వెంటనే అపాయింట్ మెంట్ తీసుకొని , కమలాకర్ ఆ ఆసుపత్రికి వెళ్లి ముందుగా తన తండ్రి ఆరోగ్యంలో ఈ రెండుమూడేళ్లలో వచ్చిన మార్పులను తెలియజేశాడు . వాళ్లు పేషంట్ ని తీసుకు రండి . ఆయనను మామూలు మనిషిని చేసే బాధ్యత మాది అని చెప్పారు . శేషయ్యని తీసుకొని వెళ్లాడు . అంతకు ముందు చేసిన అన్ని రకాల పరీక్షల రిపోర్టులు చూసి , ఒక మూడు నెలలు రోగిని తమ ఆసుపత్రిలో ఉంచాలని చెప్పారు . దానికి ఖర్చు ఎంతవుతుందో ! అని కమలాకర్ ఆలోచించేలోపే ….. డాక్టరు గారు ‘ ఫీజు మీకు అందుబాటులోనే ఉంటుంది . ఆ ఫీజు కూడా ఇప్పుడే అవసరం లేదు . మీరు మా మీద నమ్మకంతో పేషంట్ ని ఇక్కడ వదిలేసి వెళ్లండి . కావాలంటే వారానికోరోజు చూడడానికి రావచ్చు’ అని చెప్పారు . ఆ విధంగా శేషయ్యని ప్రకృతి వైద్యశాలలో వదిలి కమలాకర్ ఇంటికి వచ్చాడు .
ఇంటికి వచ్చిన కమలాకర్ కి మనసు మనసులో లేదు . ఊహ తెలిసినప్పటి నుండి పనిపాటలతో , పదిమందికి తలలో నాలుకలా తిరిగే తండ్రే తెలుసు . తండ్రికి విశ్రాంతి నిచ్చి , ప్రశాంతంగా చూద్దామనుకుంటే మనశ్శాంతే కరువైందని బాధ పడ్డాడు . వారం రోజులు గిర్రున తిరిగిపోయాయి . శేషయ్యని చూడడానికి కమలాకర్ ఆసుపత్రికి వెళ్లాడు . ఆయన ఎవరితోనో నవ్వుతూ మాట్లాడుతూ కనిపించాడు . డాక్టర్ల ఆదేశాల ప్రకారం కమలాకర్ మామూలుగా పలకరించి వచ్చేశాడు . మరో వారం గడిచిపోయింది . ఈసారి శేషయ్య ఆనందంగా అటూ ఇటూ తిరుగుతూ కమలాకర్ కి కనిపించాడు . కమలాకర్ దూరం నుండే చూసి వచ్చేశాడు . చకచకా మూడునెలలు గడిచిపోయాయి . కమలాకర్ తండ్రిని ఇంటికి తెచ్చుకోవడానికి ఉబలాటపడుతున్నాడు . ఆసుపత్రికి వెళ్లి డాక్టర్లని కలిసి , తండ్రి ఆరోగ్యం గురించి అడిగాడు . డాక్టరుగారు మీ తండ్రి అనారోగ్యానికి కారణం మీరే అనిచెప్పారు . కమలాకర్ అర్థంకానట్లు చూశాడు . డాక్టరు గారు నవ్వుతూ , చేప నీటిలో ఉంటేనే చలాకీగా ఉంటుంది . నీటిలో ఉన్నా , జలుబూ , దగ్గూలాంటి జబ్బులూ దాని దరి చేరవు . పైగా ఆ జలచరాల వల్లే నీరు స్వచ్ఛంగా ఉంటుంది . అలాగే మీ నాన్నగారి లాంటి వ్యవసాయదారులు దేశానికి వెన్నెముకలు . మీరు ఆయనకి విశ్రాంతినివ్వాలని పట్నం తీసుకువచ్చారు . కాని ఆయన మనసు అక్కడే ఉంది . ఇన్నాళ్లు దంపుడు బియ్యం , జొన్న అన్నం , రాగిసంకటి తిన్న మీ నాన్న గారికి మీరు ప్రేమ గా పెట్టే పాలిష్ బియ్యంతో వండిన అన్నం అరగటం లేదు . వ్యవసాయదారులకు పొలం పనులే వ్యాయామం . ఇక్కడికి రావడంతో శారీరిక శ్రమ తగ్గిపోయింది . మనిషికి బంధువులు , స్నేహితులు ఆక్సిజన్ లాంటివారు . ఆయన పల్లెలో పదిమందితో కష్టసుఖాలు పంచుకుంటూ , చేదోడువాదోడు గా బతికారు . మీరు ఇక్కడ అపార్టమెంటులో ఒక రకంగా పంజంరంలాంటి ఇంట్లో బంధిస్తే ఆయన మనసు , మాట మూగబోయింది . వాటన్నిటి పర్యవసానమే ఈ ఆరోగ్యసమస్యలు అని చెప్పారు .
అన్నీ విన్న కమలాకర్ దీనికి పరిష్కారమేమిటని అడిగాడు . దానికి డాక్టరు గారు “ నేను కొంచం సేపు డాక్టరుగా కాక మామూలు మనిషిగా మాట్లాడాలనుకొంటున్నాను అంటూ ఇలా మొదలు పెట్టారు . రైతన్నలే దేశానికి అన్నదాతలు . చాలా మంది రైతు బిడ్డలు వ్యవసాయాన్ని కాదని, రకరకాల వ్యాపారాలు చేసుకుంటున్నారు . దానికి వారి కారణాలు వారికున్నాయి . వ్యవసాయం పై ఆసక్తి ఉన్న మీ నాన్నగారి లాంటి వారిని , చదువుకున్న మీలాంటి వారు పట్టణలకి తీసుకువస్తే , పల్లెలు కూడా రోగగ్రస్థమవుతాయి . పల్లెలలో వ్యవసాయం చేసేవారు లేక , వ్యవసాయభూములలో వ్యాపారసముదాయాలు వెలుస్తున్నాయి . పదిమంది ఆకలిని తీర్చే అన్నదాతలు కనుమరుగైతే , పిడికెడు బియ్యం కోసం పరాయిదేశాలకు సలాం చేస్తూ , వారి లాభాలకు మనదేశాన్ని తాకట్టు పెట్టి , వాళ్ల కు బానిసలుగా బతకాల్సి వస్తుంది . ఒక రకంగా స్వతంత్రభారతంలో ఆధునిక వెట్టి చాకిరి అనవచ్చు .
డాక్టర్లు వ్యాధులు రాకుండా చేయలేరు . రోగులకు వైద్య సహాయాన్ని మాత్రమే అందించగలరు . అదే రైతన్నలు అన్నపూర్ణలాగా దేశ ప్రజల ఆకలిని తీర్చటమేకాక, పచ్చని పంటల తో , పైరగాలులతో , మంచి ఆరోగ్యానికి ఇతోధికంగా సాయపడతారు . సకాలంలో వర్షాలు పడేట్లు చేసి దాహార్తిని తీరుస్తారు . వారు ప్రకృతి మాత ప్రియపుత్రులు . దేశ ప్రజల ఆనందం ,ఆరోగ్యం, ఐశ్వర్యం అంతా పల్లెలలో , అక్కడి అమ్మలాంటి చల్లని ప్రకృతి ఒడిలో నిక్షిప్తమై ఉంటుంది . అలాంటి పల్లెకారుల జీవితాలను మీ లాగా చదువుకొన్న , నాగరికులే వ్యాధులపాలు చేస్తూ , ప్రకృతి మాతకి గర్భశోకాన్ని మిగులుస్తున్నారు అంటే తాను కూర్చొన్న కొమ్మని తానే నరుక్కున్నట్లు అంటూ “ తన ప్రసంగాన్ని ముగించాడు .
అంతా విన్న కమలాకర్ కి తండ్రిని పట్నం తీసుకొచ్చి , తండ్రి అనారోగ్యానికి కారణం కావడమేకాక , పరోక్షంగా రాబోయే తరానికి ఆకలి మంటలు మిగులుస్తున్నానేమో అన్న ఆలోచనలో పడ్డాడు . తండ్రిని తిరిగి పల్లెకి తీసికెళ్తూ , తోటివారికి పల్లెల గొప్పదనాన్ని చెప్పి , ఎంత చదువుకున్నా ఇంటికొకరు వ్యవసాయాన్ని వృత్తి గా స్వీకరించి , పర్యావరణ సమతుల్యాన్ని కాపాడాలని పిలుపునిచ్చాడు . ఆ విధంగా తల్లి రుణాన్ని కొంత వరకైనా తీర్చుకోవచ్చని సందేశాన్ని అందించాడు . సొంత గూటికి చేరిన శేషయ్య ‘ అమ్మ ఒడిని ‘ చేరిన పిల్లాడిలా సంబరపడ్డాడు .
**************

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information