Tuesday, December 23, 2014

thumbnail

కన్నీటి విలువ

కన్నీటి విలువ
- పోడూరి శ్రీనివాసరావు

భగవంతుడు నాకో అపురూపమైన వరమిచ్చాడు
కష్టాలనైనా, సుఖాలనైనా ఒకేలా చూడమన్నాడు
అందుకే కష్టాలకు కన్నీళ్లిచ్చాడు...
సుఖాలకు కూడా కన్నీళ్ళే ఇచ్చాడు...
కానీ, కనుల నుండి తొణికిన
ఆ కన్నీళ్లు.. కష్టానివో.. సుఖానివో
తెలుసుకోలేడు, ఏ మానవమాత్రుడూ!...
కన్నీరు చాలా ఖరీదయినది
అందుకే నా కన్నీరు వృధా చేయను
సుఖంలో వచ్చే... ఆనంద భాష్పాలను
కంటి కొనల్లోనే తుడిచేస్తాను ఆరంభంలోనే...
కానీ... దుఃఖాశృవులు
గట్టు తెగిన, గేట్లు తెరచిన
ఆనకట్ట లాంటివి...
ఆనందభాష్పాల్లా కాదు...
తుడిచేయడానికి...
అందుకే అతికష్టం మీద
అదిమి పడతాను
అదీ.. కొంత ప్రవాహం
బయటకు వచ్చాక!
దుఃఖాశృవులతో
నా చెక్కిలి తడిసాక!!
కన్నీరు విలువ తెలిసినవాడవయితే
ఏ ఒక్కరి మనసూ బాధించకు...
వారి వదనాలలో ఎప్పుడూ
నవ్వులు పూయించు...
ఆనందంతో జీవన సరాగాలు వెలయించు!
స్త్రీ కంట కన్నీరొలికితే
ప్రళయాలె సంభవిస్తాయి
మన పురాణ కాలం నుంచీ
ఈ విషయం మనకనుభవమేగా?
కనుల నుండి స్రవించే కన్నీరు
చిన్న బిందువుగా మొదలయి
ధారగా మారి, పాయగా పెరిగి
నదిలా ప్రవహించి, సాగరంలా కల్లోలించితే
సమస్త సునామీలూ... బలాదూరే...
చివరకు...
కళ్ళలోని నీళ్లన్నీ ఇంకిపోతే
ఏ భావం వ్యక్తపరచలేని
శూన్యమైన తటాకం...
మనిషి మనోభావాన!
మిగిలిపోయిన వేదన!!!

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information