Wednesday, April 23, 2014

thumbnail

కొరివి దయ్యం - రచన : భవానీ ఫణి

చిన్నా కళ్ళు నలుపుకుంటూ పెరట్లోకి వచ్చాడు . వాడికి దూరంగా పిల్లల అరుపులు  వినిపిస్తున్నాయి . ఆ రోజు ఆదివారం . ఆవేళ  పొద్దున్నుంచి  వాడు ఐస్ ప్రెస్, కోతి కొమ్మచ్చి ఆడి , ఆడి అలిసి పోయాడు. మద్యాహ్నం ఇంటికి వచ్చి అన్నం తిని పడక వేసాడు . ఇప్పుడే అమ్మ కుదిపి కుదిపి లేపేసింది . "లేవరా చిన్నా, ఇంత సేపు నిద్రపోతే ఇంక రాత్రి ఏం పడుకుంటావ్ " అని .
వాడికి లేవాలని లేదు . కానీ తప్పనిసరై లేచి వాళ్ళమ్మ ఇచ్చిన పాలు తాగేసి ఇలా పెరట్లోకి వచ్చాడు . ఇంకా చీకటి పడలేదు గానీ ఇప్పుడిప్పుడే పడుతోంది కొంచెం కొంచెం.
ఆ టైం కి వాడి అన్నయ్యలు , వాళ్ళ నేస్తాలు అక్కడ క్రికెట్ ఆడతారు . వాళ్ళ పెరడు చాలా పెద్దది . అంత స్థలం మాటి మాటికీ బాగుచేయించలేక కొంత మేర శుభ్రం చేయించి మిగతాది అలా వదిలేస్తుంది  వాళ్ళమ్మ.
అందుకే కొంచెం ముందుకి వెళ్తే ఎత్తుగా పెరిగిన గడ్డి ఉంటుంది . అక్కడక్కడా ముళ్ళపొదలు కూడా ఉంటాయి . చుట్టూ దెయ్యాలా కొబ్బరి చెట్లు కూడానూ. ఇంతకుముందు చిన్నా ధైర్యం గానే పెరడంతా తిరిగేవాడు . కానీ మొన్నామధ్య  అక్కడ ఓ పెద్ద పాముని చంపారు . అప్పటినించీ చిన్నా కి కొంచెం భయంగా ఉంది . అది పొడ పాముట . అది కరిస్తే ఒళ్ళంతా పొడలు పొడలు గా రాలిపోయి చచ్చిపోతారట . సత్యం పెదనాన్న చెబుతుంటే విన్నాడు .
వాడికి ఆడుకునే పిల్లలు సరిగ్గా కనిపించడం లేదు అక్కడ్నించి . ముందుకి వెళ్ళాలి అంటే భయం . వాడికి పాములంటేనే భయం .  గుర్రాలంటే అస్సలు భయం లేదు . పోయిన్నెల కొమ్మ దాసరాళ్ళు  గుర్రాలు తమ పెరట్లో కట్టుకున్నారు. వాళ్ళు ఆ గుర్రాల మీద  సామాను వేసుకుని ఊరూరా  తిరుగుతూ దేవుడి కథలుచెప్పి పాటలు  పాడుతూ
ఉంటారుట.  చిన్నాకీ, రఘూకీ అవి ఎక్కి స్వారీ చెయ్యాలని సరదా .కానీ  వాళ్ళు చిన్నపిల్లలని ఎవరూ వాళ్ళని ఎక్కనివ్వరు . అందుకే వాళ్ళిద్దరూ ఒక ఆలోచన చేసారు .
మద్యాహ్నం వేళ ఎవరూ లేకుండా చూసి , పిట్టగోడ ఎక్కి గోడవారగా కట్టి ఉన్న గుర్రం పైన దూకాలని వాళ్ళ ప్లాన్ . ముందు మెల్లగా గుర్రాన్ని విప్పేసారు . కానీ గోడ ఎక్కాకా రఘు గాడికి భయమేసినట్టుంది . కదల్లేదు . చిన్నా మాత్రం దూకేసాడు . అంతే అది బెదిరి పరుగందుకుంది . వాడు దాన్ని గట్టిగా పట్టుకుని కూర్చున్నాడు . అది పదినిమిషాల పాటు అలా ముళ్ళ పొదల మధ్యలోంచి పరుగులు పెడుతూనే ఉంది  దాని యజమాని వచ్చి ఆపేదాకా . అప్పటికి చిన్నా ఒళ్లంతా శుభ్రంగా గీరుకుపోయింది . తర్వాత  వాళ్ళ అమ్మ చేత ,అన్నయ్యల చేత గట్టిగానే చీవాట్లు తిన్నాడు కూడా.
ప్రస్తుతం లోకి వస్తే వాడి  అన్నయ్యలు  ఆడుతున్న చోటుకి ఎలా వెళ్ళాలో వాడికి అర్ధం కావట్లేదు . వాళ్ళంతా క్రికెట్ ఆడతారు . చిన్నాని ఎలాగూ ఆడనివ్వరు . కానీ చూడాలని ఉంది వాడికి . పాముల భయం ఒక్కటే కాదు . వాడికి ఇంకో భయం కూడా ఉంది . దెయ్యాల భయం . అందులోనూ నిన్న రాత్రి జరిగిన విషయం వల్ల వాడికి ఇంకా కాస్త భయం  ఎక్కువైంది .
ముందు రోజు సాయంత్రం  రామం బాబాయి, "సినిమా కి వస్తారా"  అని నాగరాజు మావయ్యనీ, సూర్యం అన్నయ్యనీ అడుగుతుంటే విన్నాడు . వాళ్ళు రామన్నారు . చిన్నా వస్తానని చెప్పాడు వాడ్ని అడగకపోయినా. రామం  బాబాయి ఎప్పటిలాగే వద్దన్నాడు . పైగా "నువ్వు చిన్న పిల్లాడివి రా, అలాంటి సినిమాలు చూడకూడదు"  అన్నాడు కూడా . చిన్నా కి కోపం వచ్చింది తనని చిన్న పిల్లాడు అన్నందుకు .
 అందుకే మొదటి ఆట సినిమా మొదలయ్యే టైం కి సినిమా హాలు దగ్గర కాపు కాసాడు . అక్కడికి వచ్చిన బాబాయి ని పట్టుకుని వదల్లేదు లోపలికి తీసుకెళ్ళే వరకు . సినిమా మొదలయ్యాక బాధపడ్డాడు చిన్నా తను చేసిన సాహసానికి . అది దెయ్యాల సినిమా . అసలే వాడికి దెయ్యాలంటే భయం . ఇప్పుడు ఇంటికి వెళ్దామంటే బాబాయ్ తంతాడు . అందుకే ప్రాణాలు ఉగ్గబట్టుకుని కళ్ళు మూసుకుని కూర్చున్నాడు సినిమా అయ్యేవరకు .
అందుకే  ఇంత ఆలోచన చిన్నాకి. అసలే చీకటి పడుతోంది . పాములు , దెయ్యాలు కలిసి తిరుగుతూ ఉంటాయో  ఏమో . ఏం చెయ్యాలా  అని ఆలోచిస్తూ నిలబడిపోయాడు  పెరటి గుమ్మం దగ్గర. అప్పుడు వాడికి మెరుపులా ఒక ఆలోచన వచ్చింది .
*****************************************
దీపాలు పెట్టి చాలా సేపయింది . చిన్నా వాళ్ళ అమ్మకి ఆందోళనగా ఉంది. స్నానాలు చేసి భోజనానికి వచ్చిన చిన్నా అన్నయ్యల్ని అడిగింది వాడి  గురించి . వాళ్ళు తెలీదన్నారు .
" అదేంటిరా , పడుకుని లేచి వాడు మీ దగ్గరికేగా వచ్చాడు " అందామె మరింత కంగారుగా .
" ఎక్కిడికి పోతాడమ్మా , రఘు గాడి ఇంట్లోనో, బాబి గాడి ఇంట్లోనో ఉండి ఉంటాడు , భోంచేసి తీసుకొస్తాలే "అన్నాడు చిన్నా పెద్దన్నయ్య .
కానీ వాళ్ళ ఇంట్లో లేడు చిన్నా . ఎంత వెతికినా కనిపించలేదు . ఊర్లో సగం మంది పైగా వాళ్ళ ఇంటి దగ్గర పోగయ్యారు .పొలాల్లోనూ తోటల్లోనూ వెతికారు . సినిమా హాల్లో రెండు సార్లు చూసి వచ్చారు . ఇక ఆఖరికి  పొరపాట్న పడ్డాడేమో అని నూతులన్నీ వెతికారు . చిన్నాజాడ లేదు .
ఓ పక్క వాళ్ళమ్మని పట్టుకోలేక పోతున్నారు.  తండ్రి లేని పిల్లాడు , అందర్లోకీ చిన్నవాడని  వాడంటే ప్రాణం ఆవిడకి .
"వాడు పెరట్లో కే వెళ్ళా డన్నయ్యా , సరిగ్గా చూసారా " బేలగా అడిగిందామె విశ్వాన్ని .
"నేనే  స్వయంగా అంతా చూసానమ్మా , లేడక్కడ " అన్నాడాయన బాధగా .
" ఆ లాంతరు నాకివ్వన్నయ్యా , ఒక్కసారి నేను చూసొస్తాను అంది  ఆశ చావక. మెల్లగా లేచి లాంతరు పట్టుకుని పెరట్లోకి వచ్చింది .
చిన్నా చిన్నా అని గట్టిగా పిలుస్తూ ఓ పది నిముషాలు వెతికింది .ఎక్కడా అలికిడి వినిపించక  నిరాశగా  వెను తిరిగింది . అప్పుడు ఎక్కడి నించి వచ్చాడో వచ్చి ఆమె కాళ్ళకి చుట్టుకున్నాడు చిన్నా . వెంటనే వాడ్ని ఎత్తుకుని మొఖమంతా ముద్దులతో నింపేసింది . "ఎక్కడి కెళ్ళావు రా నాయనా " అంటూ.
అప్పుడు మెల్లగా చెప్పాడు చిన్నా అసలు సంగతి
వాడికి పిల్లలు ఆడుకునే చోటుకి వెళ్ళడానికి భయం వేసింది . అందుకే పక్కనే ఉన్న కొబ్బరి మొక్క ఎక్కి చూసాడు . అక్కడ్నించి ఆట బాగానే కనిపించింది . కొంత సేపు చూసాకా అసలే బద్ధకంగా  ఉండటం వల్ల వాడికి మళ్ళీ నిద్రొచ్చింది . మెల్లగా ఆ మొక్కని కావలించుకుని నిద్రలోకి జారిపోయాడు . మళ్ళీ మెలకువ వచ్చి చూసేసరికి అంతా చీకటి . ఎవరూ కనిపించలేదు . క్రిందకి దిగుదామంటే పాములుంటాయేమోనని  భయం చీకట్లో .
***************************************************
క్షేమంగా వాళ్ళమ్మ చంకలో ఉన్న చిన్నాని  చూసి అందరూ హాయిగా ఊపిరి పీల్చుకున్నారు. విషయం తెలుసుకుని  కొందరు చాటుగానూ , కొందరు గట్టిగానూ నవ్వడం మొదలు పెట్టారు .
"పిన్నీ,మీ ఇంట్లో మంచాలు మాకిచ్చేయ్ , ఎలాగు చిన్నాగాడు కొబ్బరి చెట్టు మీదే గా పడుకుంటాడు " అన్నాడు రాజా
చిన్నా ముఖం కోపం తో ఎర్రబడింది . ఎప్పుడూ వెటకారమే వీడికి .
" ఒరేయ్, చిన్నా దొరికాడు , వెతకడం ఆపమనండి " అని ఓ అరుపు అరిచాడు విశ్వం మావయ్య .
"ఏరా ! నే ఇందాకా వచ్చి పెరడంతా వెతికాను కదరా , నువ్వు చూడలేదా నన్ను  " అన్నాడు ఆయన చిన్నాని ప్రేమగా చూస్తూ .
అప్పటివరకు కోపంగా ఉన్న చిన్నా ముసి ముసి నవ్వులు నవ్వడం మొదలు పెట్టాడు . ఎందుకో అర్ధం కాక అందరు ఒకరి ముఖాలు ఒకరు చూసుకున్నారు .
"అది నువ్వేనా మావయ్యా, చీకట్లో నువ్వు కనిపించలేదు . లాంతరు గాల్లో ఎగురుతోందని కొరివి దెయ్యం అనుకున్నాను "
ఆ మాటలకి అందరూ ఘొల్లున  నవ్వారు .
ఆ విధంగా చిన్నా చిన్నప్పటి చిన్ని కథ సుఖాంతం అయింది .
**************************************

Subscribe by Email

Follow Updates Articles from This Blog via Email

Comment with Facebook

No Comments


Worlds Best Telugu Online Magazine

మా గురించి

నమస్కారం ! అచ్చతెలుగు లోగిలికి స్వాగతం.

నా పేరు భావరాజు పద్మిని.

5 ఏళ్ల క్రితం 'అచ్చంగా తెలుగు' అనే పేరుతో ముఖ పుస్తక తెలుగు బృందం స్థాపించాను. అంచెలంచలుగా ఎదిగిన ఈ బృంద సభ్యుల సంఖ్య ఇప్పుడు వేలల్లో ఉంది. ఎందరో తెలుగువారి మనసులు చూరగొంది 'అచ్చంగా తెలుగు'. ఒక్క చేత్తో మొదలైన ఈ తెలుగు సాహితీ యజ్ఞానికి ఇప్పుడు అనేక చేతులు ఊతం అందిస్తున్నాయి. 'నేను' నుంచి 'మేము' కు ఎదిగాము. అభిమానుల అక్షర హారతులు, ప్రోత్సాహమే పెట్టుబడిగా, ఇప్పుడు మేము మరింత ముందుకు వెళ్లి 'అచ్చంగా తెలుగు' అనే అంతర్జాల మాస పత్రికను స్థాపించాము.
వీరిలో ముఖ్యమైన వారి పరిచయం....

aboutus.acchamgatelugu Click here to Read More. Feel free to reach us for more information